Ai khublei kyrpang u MLA ka Nongpoh ïa ki paidbah bad ki nongkyrshan

Nongpoh, Lber 08 : U Bah Mayral Born Syiem u ba la shah jied biang haka sien kaba ar kum u MLA ka Nongpoh mynta ka sngi u la ai ka jingkhublei ba kyrpang ïa ki paidbah jong ka Nongpoh Constituency naduh ki nongkyrshan bad kumjuh ruh kito kiba bym la kyrshan ha kane ka elekshon bala dep, kiba la pynjop biang ïa u ha kane ka kynti ban leit mihkhmat biang ïaka Nongpoh Constituency sha ka iing Dorbar thawaiñ ka jylla naka bynta ban bteng ïaki jingshakri ïaka Nongpoh Constituency bad ka dong Ri-Bhoi hi baroh kawei.
Haba kren sha ki lad pathai khubor mynta ka sngi ha ïing sah jong u ha Nongpoh, u la ong ba kum u MLA ba ki paidbah kila pynjop u dap da ka jingsngewnguh ïaki, ki nongtrei jong ka party kiba trei shitom, ki nongkyrshan ba harieh, ki bahaiing hasem, ki para shnong bad baroh ki paidbah ba kin kynmaw haki jingduwai ba un lah ban kit ban bah ïaka lyngkor namar kum u nongmihkhmat u donkam ka jingkyrshan haki jingduwai namar kam dei kaba suk ban shakri namar ki jingkhmih lynti kiba bun ngin dang lah ban trei khambha ha kine ki 5 snem ban wan.
Kum u nongmihkhmat ba ki padibah kila jied, u don shibun ki jingangnud ban bteng ïaka kam, kum ka jingpynthikna ban pynrung ïaka ktien khasi haka khyrnit kaba 8 jong ka riti synshar ka ri India, ban kyntiew ïaka koit ka khiah khamtam ka jingangnud ban wanrah ïaka Medical College, ba kum ka district ka don hok ban ioh katkum ki kyndon jong ka Aspirational District.
U la ong ruh ba kum u MLA un shimkhia ban peit bad khmih ïaka iohkam iohjam ki khun samla la ha kano kano ka kam ba ki samla jong ka them Ri-Bhoi kin ioh ïaki lad ki lynti, ki kam ki jam haki tnad treikam sorkar bapher bapher ryngkat ka jingkyrpad ruh ïaki ba kin trei shitom ban minot thop haki eksamin thep kam ki jong ki.
Ha kaba ïadei bad ka pule ka puthi u Bah Mayral Born Syiem u la kren shai ban pynthikna b aka Ri-Bhoi College, Nongpoh bad ka Northern Ri-Bhoi College, Umden kin dang kiew shaphrang, ban plie noh ïaka ITI College ha Nongkhrah, naka bynta ka jingmyntoi ki khun samla haka pule ka puthi bad ka jingnang jingstad.
Kum u nongmihkhmat ba ki paidbah kila pynjop un buddien ruh ban wanrah ïaka C&RD Block ha Umden naka bynta ka jingpynsuk bad jingmyntoi jong kiba bun ki shnong ha katei ka thaiñ namar kumba long mynta ki paidbah khamtam ki nongïalam shnong ki hap ban wan shaduh Umling naki shnong jong ki kaba da ki phew kilometer kaba long shisha ka jingeh kaba khraw, ban peit kyrpang ïaki nongrep naduh ki symbai, khamtam ka ïew ka hat ka jingshalan ïaki mar rep naduh ki jhur ki jhep, ki soh ki pai bad kiwei kiwei.
U la ong ruh ba kitei ki jingangnud shisien leh ngin nym lah, hynrei ngan pyrshang katba lah ka buit ka bor ban pynurlong ïaki jingangnud bad ki jingkhmih lynti jong ki paidbah khamtam mynta ka kynti la ioh ruh ban ïa treikam lang bad ka sorkar naka bynta ka jingmyntoi jong ki paidbah ka Nongpoh Constituency bad ka dong Ri-Bhoi hi baroh kawei bad kyrpad ruh ïaki paidbah ban ai ka jingïatreilang naka bynta ki kam pynroi.