Ka jingdon ka ITI ka jingmyntoi ïa ki samla, plie u bah Shakliar Warjri ïa ka ITI ha Shnong Sakwang

Mawkyrwat, Rymphang 15: U Myntri ba dei peit ïa ka tnat Labour, Employment & Skill Development, Sports & Youth Affairs Department, Registration & Stamps Department jong ka Sorkar Meghalaya, u bah Shakliar Warjri mynta ka sngi ka 15 tarik u Rymphang, 2024 u la plie ïa kawei na ki shlem ai jinghikai ka Industrial Training Institute (ITI) kaba don ha shnong Sakwang, South West Khasi Hills District, Mawkyrwat.
Lah ban kdew ba ïa kane ka Industrial Training Institutes (ITI) la tei ha ka jingmang pisa kaba T. 7 klur tyngka lyngba ka Enhancing Skill Development Initiative (ESDI) Scheme jong ka Sorkar India bad ha kane ka jaka ynsa ïoh ban pynrung ïa ki 5 jait ki jait jinghikai na ka bynta ki samla jong ka dong ka thaiñ kata ha ka Surface Embroidery Trade (SET), ki Wiremen, ka Office Assistant bad Computer Programme (OA&CP), ka Multimedia Animation bad Special Effect (MA&SE) bad ka Driver-cum-Mechanic (DcM).
Haba kren kum u kongsan ha kane ka jingïalang u bah Shakliar Warjri u la pynpaw ïa ka jingsngewkmen ban ïa don bynta lang ha ka jingplie ïa kane ka skul ka ban ai jingmyntoi ïa ki khun samla bad ha kajuh ka por kan long ka jingkyrkhu ïa ka distrik bad ïa ka imlang sahlang. Shuh shuh u khmih lynti ba ka sorkar kan pyrshang katba lah ban pynbit pynbiang ïa ki jingdonkam na ka bynta ban kyntiew ïa kane ka jaka ai jinghikai da kaba kyrmen ban pan shuh shuh ki lad jingïarap na ka sorkar India na ka bynta ban shna bun kum kine ki jaka ai jinghikai ha baroh kawei ka jylla khnang ban ai mynsiem ïa ki khynnah samla ban pynrung kyrteng bad ban pyntbit ïa lade ha ki laiñ bapher bapher bad ba kin phai khmat sha kiwei pat ki lad ki lynti kum ha kaba seng ïa la ki jong ki kam ki jam khnang ba ka jingim jong ki kan ym bijai ei.
U la pynshlur ïa ki kmie ki kpa ban phah ïa la ki khun sha kiba kum kine ki jaka ai jinghikai bad ban ym khmih lynti than tang ha ki kam sorkar bad u khmih lynti ba hadien habud yn lah ban ai kam ai jam ïa ki samla kiba pass na kine ki shlem ai jinghikai. Ha kajuh ka por u la pynpaw ïa ka jingangnud ban buh da ki jaka sah ne ki hostel hadien habud na ka bynta kito ki khynnah kiba sah sha ki jaka kiba jngai. U la ïathuh ba kane ka jaka ai jinghikai yn sdang shwa tang kumba 5 tylli ki Short Term Trade Course bad u khmih lynti ba ha u bnai ‘Nailur kin don bun ngut ki ban pynrung kyrteng ha kane ka institution bad kyrmen ba kan long ka jingkyrkhu ïa kiba bun ki khun samla jong ka dong ka thaiñ.
U bah Renikton Lyngdoh Tongkhar, MLA ka Mawkyrwat Constituency ha ka jingkren jong u, u la pynpaw ïa ka jingsngewnguh ïa ka Dorbar Shnong Sakwang kaba la noh kylluid mynsiem ïa kane ka jaka ha kaba la lah ban shna ïa kane ka jaka ai jinghikai kaba long ka jingkyrkhu ïa ki paidbah jong ka dong ka thaiñ lyngba ka sorkar India kaba la kyrshan pisa ha ka ban tei ïa kane ka ITI ka ban long ka jingmyntoi ïa shibun ki longïing longsem jong kane ka dong ka thaiñ. U la kyrpad ha kajuh ka por ïa ka sorkar ba kan ïaleh katba lah ban pynbiang ïa ki jingdonkam jong kane ka jaka ai jinghikai bad u la kular ban ai jingkyrshan kaba u lah na ka bynta ban kyntiew shuh shuh ïa kane ka jaka ai jinghikai da kaba kyntu ïa ki nongpynïaid jong kane ka jaka ai jinghikai ba kin ai ka jingshakri kaba bha tam bad ba ki jingbymbiang kiba don hangne hangtai kin ym lah long ka jingdkoh ne ki diengpyngkiang ha ka jingpynï beit ïaid ryntih ïa kane ka jaka ai jinghikai.
U la pynpaw ba ka jylla ka donkam ki briew kiba nang ban trei da ki kti ha ki laiñ bapher bapher bad u khmih lynti ba kane ka jaka hikai kan pynmih bun bha ki briew kiba tbit ha ki laiñ bapher bapher ki ban long ka jingmyntoi ïa ka imlang sahlang bad ha ka jylla baroh kawei.
Ha ka jingkren jong u C. Songate, IRS, Principal Secretary jong ka Labour, Employment & Skill Development, Sports & Youth Affairs Department, Registration & Stamps Department jong ka Sorkar Meghalaya u la ong ba kane ka dei ka sngi ka ban sah kynmaw bad ki briew jong kane ka dong ka thaiñ ki long kiba donbok ban ïoh kum kane ka jaka ai jinghikai. Ula pynshlur ïa ki khun samla ban wan shakhmat ban pynrung kyrteng na ka bynta ban ïoh jinghikai ha ki laiñ bapher bapher na ka bynta ka jingmyntoi jong ki hi bad ka department kan pyrshang ban pynbit pynbiang ïa kane ka jaka ai jinghikai khnang ba kan lah ban ai shibun ki jingshakri na ka bynta ki paidbah jong kane ka dong ka thaiñ.
Ïa ka jingïalang la pynïaid da u bah A. Jyrwa, Employment Officer jong ka Directorate of Employment & Craftsmen Training, Shillong, ka kong Matsiewdor War Nongbri, Secretary jong ka Labour, Employment & Skill Development, Sports & Youth Affairs, Registration & Stamps Department jong ka Sorkar Meghalaya .