23 tarik yn ïaid paidbah ka HYC ha Nongpoh ba mad jingeh ki paid khappud bad shah pyndik haka Assam

Nongpoh, Rymphang 15: Ka Hynñiewtrep Youth Council (HYC) Ri-Bhoi District kala rai ban pynlong syndon da ka jingïaid paidbah haka 23 tarik mynta u bnai namar ka jingeh ba ki paidbah ki mad haki thaiñ khappud ka Ri-Bhoi District.
Haba kren sha ki lad pathai khubor naka liang u Samla Hercules Suting President ka HYC Ri-Bhoi u la ong ruh ba ka seng ka dap da ka jingsngewkhia halor ka jingeh ba ki paidbah khappud ki mad jingeh naka por shaka por bad kum ban shu pynkynmaw ba dang ha kine ki khyndiat sngi kala don ruh ka jingshah thwet jong ki paidbah haki pulit ka Assam halor ka jingkynnoh bala pynpra ruh ïaki jingtei jong ka Assam haka shnong Jatalong bad ka jingsahkut ka kam pynbeit pud haduh mynta.
Shuh shuh u la ong ruh ba naka liang ka seng ka dap da ka jingsngewkhia kaba jur halor ka jingbym lah ka sorkar jylla ban bteng ban shna ïaka iing skul haka shnong Khlieh Umwang kaba la pynpra da ka sorkar Assam bad kiwei kiwei ki jingeh ba ki paid khappud ka jylla ki mad naka por shaka por naka jingpyndik ka sorkar Assam.
Dei halor kitei ki nongrim ka seng ka khot ka wer ïaki paidbah ki Rangbah Shnong bad ki sengbhalang jong ka thaiñ Ri-Bhoi ban snoh kti lang ha katei ka jing ïakhih na bynta ka suk ka saiñ jong ki paidbah khasi ba sah ha ki thaiñ khappud.