Nongstoiñ, Rymphang 15: Da ki hajar ki paidbah na kylleng ki jaka jong ka thaiñ Nongstoiñ, ki la tuid ban sngap bad shahskhor ïa ka jingpynshai paidbah jong ka Voice of the People’s Party, halor ki nongrim ba ka party ka ieng, kaba la long ha ka sngi balang ha ka jingïalang paidbah kaba la long hakhmat iew jong ka sor Nongstoiñ.
U Bah Ardent Miller Basaïawmoit President rangbah ka party haba ai jingkren pynshai sha ki paidbah ka Nongstoiñ halor ki nongrim ba skhem jong ka party ha kane ka sngi, u la pynkynmaw ruh ba ka jingpyrshah jong ki MLA ka VPP ïa ka jingkren hindi u Lat ka Jylla ha ïing dorbar thawaiñ, da kaba ong ba ki MLA ka VPP kim dei kiba shu pyrshah khlem da tip ïa ka aiñ.
U la ong ba san snem mynshwa ym don ba nud ban kren pyrshah ïa u Lat ka jylla ban kren da ka hindi. Hynrei ki MLA ka VPP ki la ieng pyrshah ban kren da ka ktien hindi. U la ong ba ka long kaba sngew thamula bad sngew samut ba kita ki MLA kiba ju wan sha ki paidbah, ban pynithuh ba ki dei ki seng trai ri ki seng riew lum, ki ong yn leh aiu da kren da ka ktien hindi. Hynrei, u bah Ardent u la sei bad pyni syndon da ka kot hapoh ïing dorbar bad ban pynshai ruh sha ki paidbah halor ki kyndon treikam katkum ka aiñ.
U Bah Ardent u la pynshai ruh halor ka jingmih surok jong ki MLA ka VPP ban pyrshah ïa ka sorkar halor ka jingweng kam syndet syndet ïa ki lai ngut ki ophisar jong ka Lokayukta. Ha kajuh ka por u la ong ba watla ki don bun kiba kren beiñ bad kynthoh ïa ka VPP, hynrei ka party naduh ki MLA bad ki nongïalam kim salia, ban mih sha surok na ka bynta ban ïakhun pyrshah na ka bynta ka daw bah jong ka jaidbynriew.
Nalor kine ki mat ba hakhmat, la ïoh ruh ïa ka jingkren pynshai na u Bah Ricky AJ Syngkon General Secretary ka party, u ba la kren halor ka jingmih ka party VPP ban shakri ïa ki paidbah, da ka jingpyrkhat kaba khia halor ka nongrim kaba skhem bad ka jingïohi jngai ïa ka lawei jong ka ri bad ka Jaidbynriew.
Nalor ki MLA ka VPP bad ki nongïalam ba hakhmat duh na Shillong, la donlang ruh u Bah T.Lyngdoh nongïalam ba radbah bad barim ka HSPDP u ba la ai jingkren, nangta u Bah Golden Nonglong nongïalam ba radbah bad barim ka seng Congress, lem bad kiwei kiwei de ki riew pawkhmat ka thaiñ Nongstoiñ, kiba la pynïasoh noh ïalade sha ka party VPP, kynthup ki longkmie bad ki samla rangbah.
Lah ban kdew hangne ba dang hadien katto katne por eh jong ka jingpynïasoh da kiba bun ki nongïalam jong ki party bapher bapher, kata naduh ki nongïalam ka HSPDP, Congress bad UDP, mynta ka sngi pat da ki hajar ki paidbah ka thaiñ Nongstoiñ ki la tuid ban pynpaw ka jingkyrshan borbah ïa kane ka party.
Ïa kane la sakhi ha ka jingïalang ha sor Nongstoiñ, ha kaba ki paidbah naduh ki nongleit iew nongleit hat, ki nongshong dukan, ki riew rangbah riew pawkhmat bad ki riew paidbah, ki la tur shakhmat ban pyrta lang da ka sur kaba jam, ‘Ha u Prah Ha u Prah’.
