Nongpoh, Rymphang 15: Ka seng Khasi Student Union, Umden Circle mynta ka sngi kala leit ban ujor syndon sha u Deputy Commissioner ka Ri-Bhoi u Arpit Upadhyay halor ka jingwan tih shyiap beaiñ jong ki paid Karbi na Wah Umiam wat ha u pud u sam ka jylla Meghalaya bad ka jaka shimet jong u wei u Rangbah Shnong haka shnong Amphreng ha Ri-Bhoi District.
Haba kren sha ki lad pathai khubor naka liang u Samla Toning Lapang President ka KSU Umden Circle haka jingsynran lang u President Ka KSU North Khasi Hills District u samla Ferdinald Kharkamni bad ki dkhot u la ong ba kum ka seng ka pynrem jur ïa katei ka jingtih shyiap beaiñ jong ki Karbi na Wah Umiam wat ha u pud u sam jong ka jylla Meghalaya haka shnong Amphreng ha Ri-Bhoi District kaba hap haka Raid Lymphuid Khyriem Syiemship da kaba pynphai ruh ïaka lynti ïaid jong ka Wah.
U la ong ruh ba kane ka jingleh jong ki paid Karbi ban tih shyiap na u pud u sam ka jylla Meghalaya bad ban pynphai ruh wat ka lynti ïaid jong ka wah ka long kaba beaiñ bad hap ban pynrem jur bad ka sorkar ka dei ban leh eiei ban pynsangeh mardor ïa katei ka jingwan tih shyiap beaiñ.
Kumba la sakhi ruh naka liang ki dkhot ka seng kila leit ruh ban jurip ïa katei ka wah dang ha kine ki khyndiat sngi ha kaba ka jingtih shyiap ha katei ka wah kala long kaba shyrkhei da kaba pyndonkam ruh da ki kor JCB ban khlong bad tih shyiap.
Naka liang u Samla Toning Lapang u la ong ba hadien ka jingïakren bad u DC ka Ri-Bhoi u la kular ban shimkhia mardor ïa katei ka kam ban ïakran ruh ïa u SP ka Ri-Bhoi bad kumjuh ruh ïa u District Forest Officer bad lada ka sorkar kam don kano kano ka jingshimkhia kaba kham kloi naka liang ka seng kala byrngem ban leh da kiwei ki lynti ba kham tyngeh.
