Jowai, Risaw 7 : Ka ophis District Programme Officer, ICDS Cell, West bad East Jaiñtia Hills ha ryngkat ka jingïatreilang bad ka ophis u Deputy Commissioner, West Jaiñtia Hills mynta ka sngi kila rakhe ïa ka 9th Poshan Maah 2026 shi bynta na ka prokram Poshan Abhiyaan–PM’s kaba ïadei bad ka jingdonkam ban pynbiang ïa ka bam ka dih ha ka longkmie bad ki khunlung.
Ïa ka jingïalang la pynlong ha District Library Auditorium, Mynthong, Jowai halor ka phang “Better Nutrition, Brighter Future, Healthier Generation.” Ha kaba u Deputy Commissioner ka WJHD u Abhinav Kumar Singh, IAS u la long kum u Kongsan haka jingïadonlang ki ophisar ka ICDS bad ki nongtrei jong ka Anganwadi.
Ha kane ka prokram la pynsngew ïa ka Mission 1000 ba la sdang da ka Sorkar Jylla haka 31 tarik u March, kaba pynleit jingmut ha ki jingïarap ba la buh kyrpang hapoh ka ‘Poshan Abhiyaan for Early Childhood Development’ (ECD) ban pynbha ïa ka jingsumar ïa ki longkmie, ban pynduna ïa ka jingïap jong ki khunlung bad ban ai jingtip sha ki longkpa shaphang ki lad jingsumar.
U Abhinav Kumar Singh, DC ula kren halor ka phang jong kane ka sngi kaba batai ïa ka jingdonkam jong ka jingbam na ka bynta ka koit ka khiah jong ki khynnah, ki longkmie bad haka imlang sahlang. U la ai khublei ruh ïa ki nongtrei ka Child Development Project Officers (CDPOs), ki nonghikai halor ka bam ka dih bad ki nongtrei ba hakhmat eh ha ki shnong kiba leit pynsngewthuh halor ka jingthmu ba bha jong ka sorkar ha ki longïing longsem.
Hadien jingïalang la pynlong ïa ka technical session, ha kaba la pynsngewthuh shaphang ka jingbam jong ki longkmie, ka jingïada na ka jingduna snam bad ka jingai jingmut shaphang ka jingbam da ka Nutritionist kong Habari Warjri bad ka jingpyni ïa ka rukom shet ïa ki jingbam kiba tei met bad kiba lah ban ïoh hala ka jong ka jaka da ka Programme Manager, Nutrition, ECD Mission, kong La-in Phanwar.
Ha kane ka sngi naka liang ki nongtrei ka Anganwadi na Thadlaskeiñ ICDS Project ki la pyni ïa ka Fashion Show kaba la pyni ïa ki mar bam kiba tei ïa ka met, katba ki nongtrei ka Amlarem ICDS Project kila pyni ïa ki jingrwai bad ka Laskeiñ ICDS Project ki la pyni ïa ka drama lyngkot.
La sdang ïa kane ka prokram da ka jingkren ai khublei na ka District Program Officer, ICDS Cell, ka kong Lucy M. Kharkongor, katba ka CDPO Thadlaskein ka kong Darinylla Lakai ka la ai ki kyntien ai khublei.
Ha kane ka sngi la pynkup burom ruh ïa ki Master Trainer, ki Staff Nurse, ki Mid-Day Meal Helpers, Lady Supervisors bad ki nongtrei Anganwadi kum ka jingithuh ïa ka jingshakri bad ka jingaiti lut jong ki haka kam.
