Nongstoiñ, Rymphang 15: Na ka daw jong ka jingbym don ki jaka sah kiba biang hapoh ka area ba ka Markasa PHC ka don, ki Doctor, ki Nurse bad baroh ki nongtrei ha katei ka jaka sumar ki hap ban shu sah wai ha ïaing ki briew.
Ka daw kaba pynlong ïaa ki nongtrei ha katei ka jaka sumar ban shu sah wai ha ki ïaing briew, ka dei namar ba ka sorkar kam shym la pynbiang ïaa ki jaka sah wat la ka area ka la biang pura ban shna ïaa ki ïaing ba ki Doctor, ki Nurse bad ki nongtrei kin shong kin sah.
Ka don ruh ka jingdkoh ha ka jingtreikam, khamtam haba don kiba pang ba shitom kiba wan poi ha ki por mynmiet mynïaong, namar lada leit sha ïaing jong ki briew ba ki sah wai kan nym long kaba bha ha ka por mynmiet.
Shuh shuh, lada poi ha katei ka jaka sumar ha ki bnai lyiur baroh saw dong la dap tang da ki rynsan biskot. Ym tip pat la ki nongrep biskot ha baroh sawdong jong katei ka jaka sumar ki da pan jingbit na ka tnad ka koit ka khiah, ne ki dei ki trai jong katei ka area ba ka don ka PHC ym shym la ïaoh jingtip satia
Ka jingkylli kaba mih ka long hato ka sorkar lyngba ka tnad ka koit ka khiah, ka ai jingbit ne em ban rep biskot ha ka syndah ka jaka sumar. Lane ba ki paitbah kin shu pyndonkam ei ïaa ka jaka katba ki nongtrei pat ki hap ban sah wai ha ïaing ki briew ïa. Ka sorkar ka la dei ban phah shna noh da ki jaka sah na ka bynta ki nongtrei ha katei ka PHC ha baroh sawdong khnang ban pynsuk ïaa ki Doctor, ki Nurse bad ki nongtrei.
