Ka jingbthah ka ophis u Comptroller and Auditor General of India (CAGI) ïa ka Sorkar Jylla ba kan khang khyrdep noh ïa ka Meghalaya Electronics Development Corporation Limited (MEDCL), kaba long ka Public Sector Enterprise (PSE) namar ka jingbym treikam shuh jong kane PSE naduh u snem 2006 ka long kaei kaei kaba pynduh mynsiem ïa ka jingtreikam ki Kompeni paidbah ha kane ka jylla.
Katkum ka kaiphod na ka CAG la ong ba ki don ki Arrear jong ki saw tylli ki Account (2018-19 haduh 2021-22) kat haduh ka 30tarik, Nailur, 2022 ha kaba ïadei bad ka jingbym die eiei jong ka PSE (Meghalaya Electronics Development Corporation Limited), kaba lam sha ka jingbym treikam naduh u snem 2006 bad kaba dang sahteng ban pynkut noh syndon naduh u Jylliew, 2011.
Ka Committee of Public Undertakings (CoPU) ha ka kaiphod bashiphew (Tenth Report) ïa kaba la rah hapoh ka Iingdorbare Thawaiñ ha ka 5 tarik, Naiwieng 2020 ka la ai jingmut ban pynkut noh mardor ïa ki PSE ki bym treikam, hapoh hynriew bnai.
Ka kaiphod ai jingkheiñ jingdiah jong ki kompeni ki dei ban pynkhreh noh mar mar hapoh hynriew bnai hadien ba la kut ka Financial Year, kata, ha kaba kut jong u Nailur kaba long ruh katkum ka kyndon jong ka Section 96 (1) jong ka Companies Act, 2013.
Lada jia ba ym lah ban leh eiei, kan ngat ha ki kyndon shaiñ kuna hapoh ka Section 99 jong ka Aiñ.
Ha kajuh ka rukom, lada jia ba don kino kino ki corporation ba la ithuh, ïa ki Accounts dei ban pyndep noh, ban ai jingkheiñ bad ban rah ha ka Iingdorbar katkum ki kyndon jong ki Aiñ.
Kat haduh ka 30 tarik, Naiwieng,2022, haduh 35 tylli ki Accounts jong ki 20 tylli ki PSE kiba treikam ki dang sahteng ban ïoh ïa ka jingsiew na ka bynta shi snem haduh hynriew snem, ong ka kaiphod u CAG.
Na ki 35 tylli ki Accounts kiba dang dei ban ïoh ïa ka jingsiew Arrear na ka bynta u snem 2021-22, ki long ka Meghalaya Transport Corporation (MTC) bad ka Forest Development Corporation of Meghalaya Ltd kiba don bun ki Accounts na ka bynta shi snem haduh san snem, ong ka kaiphod.
Ha ka jingshisha ym dei tang ha Meghalaya ba ki PSE kiba kum kine ki don, hynrei kidon ha kylleng ki jylla jong ka ri India bad kiba bun hi ki treikam bha. Hynrei balei pat ha ka jylla Meghalaya kim treikam. Kiba bun ki PSE ne kita ki Corporation, ym tang ka MEEDCL, hynrei ka MTC, ka MGCC, ka MTDC bad kiwei kiwei, kiba bun hi ki la kylla long ki Sick Unit, kiba la kylla long pynban ki hati kit kulai. Ka jingdon jong kine ki Corporation kan ïarap shibun ïa ki jingïoh kam ïh jam ki Samla bad kan kyntiew ruh ïa ka ïoh ka kot ka jylla, lada ki treikam bha. Kum ka nuksa ka Assam State Transport Corporation kadei ka Kompeni kaba treikam bha ha kaba wat ki ki kali private ruh ki kamai kit briew ruh hapoh ka ASTC bad kane ka kyntiew shibun ïa ka sorkar Assam.
Nangta ka MCCL kaba dei ka PSU kaba la rim bad kawei na ka Karkhana dewbilat ba nyngkong eh ha ka jylla ka la long ka lad ïoh kam ïoh jam ïa ki spah ngut ki briew khamtam ïa ki nong Sohra bad ka jingim ja bad kamai kajih ki briew da ka jingdon jong ka, ka la long ka jingkyrkhu kaba khraw ïa ki paidbah.
Hynrei katba nang mih ki snem la ïohi ba kawei hadien kaei ki la nang khyllem bad ki la long pynban ka jingbankhia ïa ka sorkar namar ka hap beit tyngka ïa ki. Kadei ban don ka jingwad bniah ne ka study halor kine ki sick unit ban lap ïa ka daw balei ba kim lah ban treikam bha bad balei ba ki long pynban ka jingduhnong, namar ba lada ki lah ban treikam bha, kan ïarap shibun ïa ka unemployment problem ne ka jingeh na ka jingkyrduh kam. Nangta kan long ruh ka jingplie lad ïa ki briew ha ka liang ka ïoh kam ïoh jam haba ki kam sorkar ki la jynjar bad shitom shibun ban ïoh.
