Sa shisien ngim lah ban shu ïaid lait na ka mat ba u khar hindu un pyrshang ban pyntian jubor ïangi da ki rule ki aiñ jong u, ban ïuhroit ïa ka hok bad ban pynduh ïa ka rukom bam rukom dih jong ngi ki Khasi Khara ha kane ka Ri baieit jong ngi da kaba pyrshang ban khanglad ban shohdoh masi bad ban die ban thied ïa ka masi. Kaba mut kam long shuh wat tang ri masi ruh. Kaei kane? . Hadien jong ka Lockdown 2020-21 ngi ïohi lyngba ki lad pathai khubor ba ki masi jong ki khar hindu kum ha U.P. ha Bihar bad kawei, ki ïaptngan hapoh khutimasi da ki spah tylli, namar ban die sha ki nongshohdoh Muslim ruh ym long ba kin bam hi ruh kaba sang. Te kin ïapher aïu kine na kita ki Pharisi arsap, haba ki bat halade ïa u shabi, ïa kiwei ruh kim plie, ïa lade ruh kim treh ban rung. Balei ba u nongthoh u shait ong ba u Bah Skendrowell Syiemlieh ym dei tang u Kaitor ba pawnam hynrei u dei ruh u Nongïathuhlypa bakhraw jong ka jaidbynriew jong ngi.
Ka mut aïu haba u rwai : “Ji bu biam phareng enrei, doit umchit doh kjet masei, Aah Moina, aah Moina ba shong sha ri bujngei”. U shem ba wat la duk la kyrduh, wat la ym ïoh ban bam bha bam miat kum kiwei, pynban tang ka syrwa kjat masi kaba shisien shitaïew ka la biang thikna ban aibor (vitamin) ï’u nongrep, nongbyllasngi. Kaba mut ba ka dohmasi ka dei jingbam ba kyrshan ïa ka met ka phad jong u briew. Ka pynpaw ba ha ka ri jong ngi naduh hyndai kulong kumah, ki longshwa ki hikai ban bam bam dohmasi ban koit ban khlaiñ. Dei namarkata ka daw ba ki nongkyndong wat la ki duk ruh, ki ri masi kumba san ne shiphewtylli, ym tang ban kin lur pynthor hynrei ban pyndap pynbiang de ïa ka ïoh ka kot (economy) jong ki. Namar haba ka dohmasi ka ïaid iew, kata hi ka la biang ban kyrshan ïa ki.
Kane ka jingpyrshang jong ki khar Hindu ba lyngba kata ka Sangh Parivaar ban wan hikai lynnong kot ïa briew jong ka Northeast, bym bit ban bam dohmasi bad dei ban pynlong ïa ka Masi kum ka kmie jong ka Ri India (Rashtramata), ka long thik kumba ngi ïalap jubor ïa u Hindu ba me ruh me dei ban bam da ka dohmasi ba men khlaiñ. Mutdur ! kaei ka ban jia hangta, lada u sngewthuh ïa kata, um dei ban wan pyntian jubor hangi da kita ki jingngeit khyllah jong u.
Hooid, teng teng ngi khot Mei India ïa ka Ri India, te kam lei lei kata, namar ‘Mei’ hangne ka dei ka kynja abstract noun (bym lah ban ïohi) hynrei ban pynkam Kmie ïa ka Masi te ka la dei ka pharshi bah. Ngan pynkynmaw biang, u Naga u ong, lada phi khot kmie jong ka ri ïa ka mrad, te ka la dei lypa ka jingñiewpoh ïa ka kyrdan longbriew jong ka Kmie bakha bapun ha ka imlang sahlang jong ki Naga. (In Naga custom, equating our mothers to an animal is ourightly disrespectful and insulting to the honoured and revered position, mothers occupy in the family and the society). Haba pyrshang ban wad ïa ka history naduh mynno ba la sdang ïa kane ka jing ïa khih u khar hindu ban mane blei ban pynlong kmie ïa ka ‘masi’ la shem ba ka dei naduh ki spah snem 1800 ter ter ha ka por jong ka sorkar phareng, ha kaba ha ka snem 1893-94 ka la don ka jingïa-umsnam kaba jur hapdeng ki Muslim bad ki Hindu ha ka sngi basdang ka jingrakhe niam Eid-ul-Adha jong ki Muslim namar ba ki hap ba pynïap bun tylli ki masi na ka bynta katei ka jingrakhe. Kumta, baroh ar bad Hindu bad Muslim ki ïohi ba, ka “jingïada ïa ka masi” bad “ka jingpynïap masi” kum shi bynta na ka jingngeit niam jong ki.
Related Posts
La ong ba ha ka snem 2006 ki hindu ki la pyllong ïa kata ka ‘Gow-Sanskriti-2006’ ha sem masi (Gow-shala) jong u Rantala Bafna ha Jalgaon 7-10 March 2006 bad ka motto jong kata ka jingïalang ka long “Several problems, One solution : Our dear mother Cow” (Bun ki jingeh hynrei tang kawei ka lad ban weng : ka Meimasi baieit jong ngi). Ha kata ka jingïalang, la ïashim bynta da heh jong ki 20 tylli ki seng hindu kum ka RSS, VHP, Arya Samaj, Gayatri Pariwar, Krishi Gow Sewa Sangh bad kiwei pat. La wallam ruh ïa ki stad ki jhad (scientist) hana ban pynbna ba ka eit bad ka jung masi ki dei ki dawai babha tam ïa u briew. Hynrei, ka jingïakhih ba kham jur ban pynlong Kmie ïa ka Masi dei hadien ka jingpynpra noh ïa ka Babri Mosjid ha Ayodhya da ki shongshit niam Hindu ha ka 6th December 1992 ha kaba ka Vishwa Hindu Parishad bad Bajrang Dal kiba la smai ban pynurlong ïa kata ka jingthmu ha baroh ka ri India hana ban lait na ka jingtehmraw u dohlieh (British colonial rule). Dei namar kata ka daw, haduh mynta mynne phi dang ïohsngew ba la pynïap (lynched) bad shoh bad bom ïa ki Muslim ba kit ne beh masi ha surok ne ha ki shnong ha kylleng ka India da kita ki Gau Rakshak (cow vigilanté).
Ka jingpyrshang ban pyntian jubor ïa kata ka jingïalap ba ‘ka Masi ka dei ka Kmie jong ka India’. Don bun rukom ba ki Hindu hi ki pyndonkam ïa ka masi kum ka jinglehniam jong ki, kata : Vedic era Sacrifice : Ïa ka masi la kñia kum ka jinglehniam kum ka Gomedha Yajna, ha kaba la kñia ia ka masi tymmen ban wallam biang sha ka jingim lyngba ki jingrwai (hymns) jong ka Vedic.
Ka Bam dohmasi : Ka Rig Veda ka kot niam bakhuid ba rim bha jong ki Hindu, ka kdew ïa ka jingbam dohmasi. Ki Vedic India ki shait bam bad ai sngewbha ïa ka ki guests (paralok) kum ka dak ka jingpdiang sngewbha ïa ki. Ka jingkñia ïa ka Masi ka dang ïai don hi da ki katto katne ki jingngeit Hindu, khamtam kum ki Shaktism bad ki Hindu tynrai (hindu folks) . Kat kum ki Jingthoh bakhuid jong ki Brahmanas (c.900 B.C.) bad kiwei pat ki jingthoh (texts) ki hikai ïa ka kamram (dharma) jong ka niam naduh ka spahsnem balai (3rd Century B.C.) kaba ong ba dei ban pynïap ïa u masidab ne masikmie ban khawai haba wan ki paralok ba shah khot sngewbha. Kat kum ka text jong kitei ki kot ki ong ba “ ka masi ka dei ka jingbam” wat ha kawei na ki dkhot ha “Shatapatha Brahma” (3.1.2.21). Uwei u nongïathuhlypa jong ki Hindu na mynhyndai, u Yajnavalkya u pynskhem ïa kata. Hana, ki blei ki kren “shisha shisha, ka masi bad u masidab ki kyrshan lang hangne : wan, ale to ngin buhti halor ka masi bad u masidab kiba don ka bor halor kiwei pat ki jaitmrad”, namarkata, dei ban bam bha ïa ka doh jong ki.
Te ym tip shuh, kumno kita ki jinghikai tynrai jong ka niam Hindu ki la kylla pyrdet. Wat u BN Jha u Historian ba pawnam, ha ka kot jong u kaba kyrteng “The Myth of the Holy Cow” u ban jur ba ka Masi kam dei ka bym lah ban shohdoh lane kaba Kyntang ha ka Vedic period. Hynrei kane ka jingïalap khang bam dohmasi ka kiew rasong kynsan, dei namar ka jingïatreilang ka sorkar bad ki shongshitniam Hindu (hindu fanatics). Lada, ki Hindu ki ngeit ïa kata, ba ka long kaba sang ban bam ïa ka dohmasi, ai kin pyntreikam tang ha ka jylli jong ki, kim dei pat ban thynñian jubor sha kiwei pat, kaba ktah ïa ka ‘Food habit’ bad ka culture jong ki. Ngim tip, namar ba baroh bad sengbhalang bad seng saiñpyrthei ki la pynpaw pyrshah ïa kata ka jingthmu jong uta u Jagat Guru Shankaracharya Shri Swami Swaroopanand Ji Maharaj lyngba ka seng “Gau Dhwaj Sthapana Bharat Yatra” ban pynbna ïa ka Masi kum ka Kmie jong ka ri India naduh ka 2 tarik Risaw 2024. Ka jingkylli ka long, la ka sorkar MDA kaba long kum ka Team B jong ka BJP ka nud ne em ban pynmih hukum pyrshah ïa kitei ki kynhun kumba ka sorkar u Neiphiu Rio Chief Minister ka Nagaland u la leh ne kan shu long kum ka Lymbit ban pynsngewbha baroh arliang ?.