Ka Ïew Shyllong jong ka mynnor kaba don ha Nonglyngkien bad ki katto katne ki Maw kiba don ha kane ka ïew

Mawkyrwat, Jymmang, 19: Ka long kaei kaei kaba sngewtynnad ban ïoh lad ban wad bad sngew shaphang ki khana pateng jong ki ‘riew tymmen ka mynnor namar ka jingïathuhkhana jong ki ka long kaba jia shisha bad halor ki khana pateng na ka liang u Mawphor lyngba ka jingïalam jong u bah Demikstar Lyngdoh Nonglyngkien, Executive Secretary jong ka Kur Lyngdoh Nonglyngkien, u la ïoh ka lad ban wad jingtip shaphang katto katne ki khana pateng kiba ïa dei bad ka Ïew Shyllong kaba don ha ka shnong Nonglyngkien, South West Khasi Hills District, bad kumjuh ruh ki katto katne ki khana kiba ïa dei bad ki Maw ha Ïew Shyllong.
Ha kane ka jingleit haduh ka jaka, u bah Demikstar Lyngdoh Nonglyngkien u la ïathuh ba kane ka jaka ba la khot ka Ïew Shyllong ka hap hapoh ka jingpeit jingkhmih jong ka Kur Lyngdoh Nonglyngkien na ka shnong Nonglyngkien. Ha ka juh ka por u la batai shaphang bun kiei kiei kiba ïa dei bad ka jingim jong ki ‘riew tymmen hyndai kiba don jingïasnoh ruh bad kane ka Ïew Shyllong. U la ïathuh ruh ba ïa katei ka jaka la jer kyrteng ka ‘Ïew Shyllong’ namar la wanrah ïa ka juh ka jinglehniam leh rukom na u Lum Shillong ba la ai da ka Meikha Mylliem bad suki suki, lyngba kane ka jinglehniam kñia ha katei ka jaka ka pynkylla ïa ka sha ka ïew kaba heh ha kane ka dong ka thaiñ.
Dei na kane ka jaka Ïew Shyllong ba u Nongkñia Lyngdoh bad ka Kur Lyngdoh Nonglyngkien haba ki kñia ainguh ïa U Blei Trai Kynrad, ki phai sawdong ïa kane ka jaka bad ki kyrpad ïa U Blei ba Un ai ha u khun bynriew jong ka Kur Lyngdoh Nonglyngkien ban ïoh ïa ka shongsuk shongsaiñ da ka jingrep ïa u kba u khaw, u ‘riewhadem bad ki soh ki pai bad ban ri jingri lyngba ki madan phlang ba jyrngam, ban ïoh im slem ha kane ka pyrthei da kaba trei ïa ka hok tipbriew tipblei, ban roi parum pareh ki khun ki ksiew pateng pakit lyngba u pud u sam ba la ai U Blei U ba hajrong ha tbiañ.
U la ïathuh ruh ba la ong ba dei halor u lum ha Ïew Shyllong ba ka kur Lyngdoh Nonglyngkien ka leit ban sdang ïa kano kano ka jait jinglehniam kaba ka long ka jaka kaba U Blei Trai Kynrad U la ai bad shah ïa ka kur ban kñia ainguh ïa U. “Ka dei ka jaka kynjang kaba lah ban ïohi kyndiang ïa ka jaka rep kba kaba seisoh bha kaba kyrteng ka Umshihkeng, Mawrapsaw, Mawpon, ka Phod bad haduh Pynnoh Um Kynja”, u la ong.
Na u lum ha Ïew Shyllong, lah ban ïohi ruh ïa ka madan rep kper kaba kyrteng ka ‘Maramhah’, ka ‘Mawsep’, kumjuh ruh na u lum khlieh ha ‘Ïew Shyllong’ ba kynjang lah ban ïohi lut ïa ki shnong kiba don hapoh ka Ri Khaiñ Lyngdoh Nonglyngkien kaba kynthup ruh ïa ki shnong kiba markhap bad ka.
U bah Demikstar u la ïathuh ruh shaphang ka khana jong ka Meirad Wankitkhoh Lyngdoh bad u Parad Pnan Mylliem kiba la im la shong la sah ha katei ka jaka ha ïew Shyllong. Haba phai sha ki khun ka Meirad Wankitkhoh bad u Parad Pnan, la ong ba hadien ba ki la sngewthuh ïa ka jingïathuhkhana ba dei u maw u ba la ai dak ïa ki ban mane ïa U Blei ha katei ka jaka, kumta ki la ki la jied ïa ka jaka kaba bha katkum ba kup ka khan bad ring maw ha kane ka jaka ha Ïew Shyllong.
U bah Demikstar u la ïathuh ba ha kaba ïa dei bad ki Maw ha Ïew Shyllong, ki long ki maw ki Mawniam bad ki kynthup ïa ki ‘Mawtheng’ bad ki ‘Mawthung’. U la ïathuh ba la ring, la thung bad la buh ïa ki katkum ka jingdonkam da ka Kur Lyngdoh Nonglyngkien naduh hyndai ha ka por ba ka khan ka kñia ka bthah ban buh jakamane Blei ha katei ka jaka.
Haba ka Kur Lyngdoh Nonglyngkien la nangroi, ha man la ka pateng Nongsengkñia la ong ba dei ban thung maw bad ba kawei pa kawei ka kpoh pateng ka dei ban don Mawtheng bad Mawthung. Kane ka jingthung maw hiar pateng ka neh katba dang kup ka khan ringmaw lyngba ka jingkren khana ha u ‘Thning Pathaw’ kaba la neh haduh ka snem 1800.
U la ong ruh ba kawei kawei ka jaka mawniam ka dei ban don 3 (lai) tylli ki Mawthung bad kawei ka Mawtheng. La ïathuh ba ka Mawtheng ka dei jong ka Meirad Riahbaïa, u Mawthung ba sha kamon u dei jong ka Ïutbaïah, u Mawthung ba ha pdeng uba bakham jrong u dei jong u Smari, bad u Mawthung ba sha kadiang u dei jong ka Ïongbaïa, bad la batai ba ki lai tylli ki maw kiba kyrshan ïa ka Mawtheng ki mut ba ka Kmie ka shong ha ki khun ki pyrsa bad ki ksiew.
Ha Ïew Shyllong, ki don haduh mynta ar phewsan tylli ki Mawtheng jong ki arphewsan pateng jong ki Nongsengkñia Kpoh Kur Lyngdoh Nonglyngkien bad arphew hynñiew tylli ki Mawthung hiar pateng Kñi Lyngdoh Kñia kiba dei naduh ba sdang thung maw ka kur Lyngdoh Nonglyngkien haduh ka snem 1800.
Naduh katei ka snem, ka kur ka la ïa phiah kpoh noh Sawkpoh khnang ban bit ban biang ka ïashongkha hiar ïatur kylliang jait kur bad ïa ka jingïaring Mawtheng la pynkut noh ka khan ka kñia ka la kup noh ban thung noh sa tang ïa ki mawnam kiba pawnam ha kano kano ka nam ba ka khan ka la kup. Kine ki Mawtheng bad ki Mawthung ki don ka jingïapher na kawei sha kawei pat hynrei ki jingmut ki thew ïa ka juh ka nam bad ka niam jong ka kur Lyngdoh Nonglyngkien. La ong ruh ba kine ki maw ki shong bha ha ki jaka ba ki don, ki itynnad bad shongkun shongblei bha.
Ha ka snem 1897 ha ka por ba wan u jumai ba jur ha Ri Khasi, kine ki Mawtheng ba shong kynrong ki la syntuid noh kim shong shuh ha ka jaka kaba la buh ki tymmen hyndai, bad kumjuh ruh ki Mawthung kiba la kham shong kynrong bad khlem ngam jylliew ki jingthung maw ki la kyllon noh. Kane ka jingwan u jumai ba jur ha Ri Khasi ha kane ka snem ka la ktah jur ïa ka jinglehniam kñia jong ka Kur Lyngdoh Nonglyngkien.
U Nongkñia Lyngdoh jong ka Kur Lyngdoh Nonglyngkien u la kyrpad ha U Blei Trai Kynrad ba Un pynwan biang ïa kine ki Mawtheng bad Mawthung. Ka khan ka jubab ba ym lah shuh, hynrei ka la pyni da ka jubab ba kin pyndep ïa ka jinglehniam kñia ha kano kano ka Mawniam kaba dang neh. Namarkata, ka Kur Lyngdoh Nonglyngkien ka la kohnguh bad ka la pyndep ïa ki jinglehniam kñia baroh ha ki Mawniam kiba dang neh hynrei ïa kito ki Mawtheng kiba la hap bad ki Mawthung kiba la kyllon ki shu suit shu shor bad kheiñ ba kine ki maw ki dang im katba ka Kur Lyngdoh Nonglyngkien ka dang don ha kane ka pyrthei.