Jowai, Jymmang 19: Shi bynta na ka jingpyntreikam ïa ka hukum ba la dep pynmih da ka tnad khlaw jong ka sorkar jylla kaba la khang pyrshah ban tih shyiap khlem da ïoh jingbit ne ka ‘quarry permits’ katkum ka lis Sl/no. 3 ka Schedule III jong ka Meghalaya Minor Mineral Concession Rules, 2016.
Kumta la pyntip ba kane ka hukum kala khang pyrshah ban leh ïa katei ka kam khlem da ïoh shwa ïa ka ‘environment clearance’ katkum ka kyndon hapoh ka Environment Protection Act, 1986.
Halor kane na ka liang ka sorkar ruh kala pynhap hapoh ka kyndon Section 21 jong Mines and Mineral (Development and Regulation) Act. 1957 da kaba ai bor ïa ki ophisar ban pynshitom ïa kino kino kiba donkti ne kiba leh pyrshah ïa kane ka hukum
Mynta ka sngi u bah Garod L.S.N. Dykes, IAS, District Magistrate, West Jaiñtia Hills District, Jowai ula pynbna paidbah ba la pynjari syndon da ka kyndon 144 Cr.Pc ha baroh kawei ka District kaba khang pyrshah ïa ka jingtih shyiap da kino kino ki ki briew shimet ne ki kynhun bad lada lap ki lah ban shah kurup lang ïa ki tiar ba pyndonkam kum ki kali bad kiwei de.
Na ka liang u District Magistrate ula pyntip ba kane ka hukum kan treikam noh mardor tad haduh ban da pynbna ïa ka da kumwei pat.
