Julor bun bah ki surok bad jingkieng ha kylleng ka Jylla na ka jingjur slap: Dy. CM

Shillong, Jymmang 19: U Symbud Myntri Rangbah ka Jylla ba khmih ïa ka Tnad PWD (Roads) Bah Prestone Tynsong ula ong ba ka jingjot jingjulor jong ki surok bad ki jingkieng ka long kaba bun bah namar ka jingjur jong u slap hapoh ka Jylla baroh kawei.
Haba ïakren bad ki nongthoh khubor, u Bah Prestone u pyntip ba ka Sorkar kam pat ïoh jingkheiñ satia ïa ka jing julor jong ki surok bad jingkieng ha ka Jylla baroh kawei.
“Ka don ka rukom treikam ba ka Tnad PWD kan pynkhreh ïa ka jingmang tyngka khnang ban lah tei biang ïa ki surok. Ki DC kin sa lum jingkheiñ bad phah sha ka Tnad Revenue lyngba ka SDRF ba kan phah sha ka NDRF na ka bynta ban pyllait ïa ka pisa” ula ong.
U Bah Prestone u pyntip ruh ba yn sa lum ïa ka jingïalang bad ki Ophisar ka Tnad mynta ka sngi halor kane ka kam bad ong ba ka long kaba donkam ïa ka Tnad ban shimkhia bha ïa ka kam khnang ban pynthikna ba ki lad pyn iasoh kin ym dkhut.
Haba kylli halor ka Mawlai By-pass, u Symbud Myntri Rangbah ula ong ba ka jingkieng ka dei kaba biang hynrei ka surok ba pyniasoh kala shah ktah jur na ka daw jong ka jingther u slap.
“Namar kata, nga la bthah ïa u Chief Engineer bad ki Engineer ba kin leh ïa kaba donkam (ban maramot ïa ka jingkieng)” ula ong haba bynrap ba lada ka dang slap, ka jingmaramot ka lah ban shimpor kumba shitaiew eiei.
Haba pynpaw ba ka jingjulor hi ka dei namar ki bor ka mariang, u Bah Prestone ula ong “Phi tip ïa u nongshun ba shyrkhei tam ïa ka surok ka dei ka um. Ta ka daw, kane ka la jia na ka jingther u slap ïa kaba ngim shym poi pyrkhat satia”.
“Nga la bthah ïa ki (PWD) ban pynkhreh ïa ka mang tyngka” ula ong haba pyntip ruh ba ka Tnad kala tyrwa ban nang pynjanai ïa ka surok By-Pass naba ka surok na Mawroh kala jan dep artad.