Jied nongmihkhmat da kaba puson ym da kaba leh shongshit: Robertjune Kharjahrin

Mawkyrwat, Rymphang 28: Ka Regional Democratic Alliance (RDA) kaba kdup ïa ki ar tylli ki party ka United Democratic Party (UDP) bad ka Hills State People’s Democratic Party (HSPDP) mynta ka sngi ka 28 tarik u Rymphang, 2024 ki la pynlong ka jingïalang paidbah ban pynshai ïa ki mat ki jura shwa ban poi ka MP Election ha Ïew Umdohlun, South West Khasi Hills District.
U bah Robertjune Kharjahrin kum u kyrtong MP na ka Shillong Parliamentary Seat, haba kren ha ka jingïalang paidbah ha Ïew Umdohlun u la kyntu ïa ki paidbah jong ka Bri u Hynñiewtrep ba haba jied ïa ki nongmihkhmat kim dei da lei lei ban jied da kaba leh shongshit hynrei da kaba puson bad pyrkhat sani bha namar ka jingjied ïa ki nongmihkhmat sha ka Meghalaya Legislative Assembly ne hapoh ka Lok Sabha ka long kaba donkam ha kaba ma ki kin long ki nongïasait ïa ki jingdonkam jong ki paidbah.
U la ong ruh ba ka jingïeng jong nga ban ïa khun ïa kane ka elekshon ka long da kaba ïa sngewthuh jingmut ki ar tylli ki party kata ka UDP bad ka HSPDP da kaba ïeng ha ka nongrim ban ïada ïa ka ri bad ka jaidbynriew ha ka ban pynneh pynsah ïa ka khyndew ha shyiap, ïa ka riti ka dustur bad ïa ki snap kyrpang jong ngi ka jaidbynriew bad ïa ka ban kyntiew ka jaidbynriew na ka por sha ka por.
U la pynpaw ruh ba ha shwa ba un shim ka rai ban ïeng ïaleh ïa kane ka elekshon sha ka Lok Sabha, u kynmaw ïa kawei ka kyntien kaba ong, “ka shait poi ka por ha u briew ba ngi hap ban jied tang kawei kata ka long ban jied ïa ka lynti ban pyndem tdong lane jied ban ïeng rasong”, ong u bah Robert.
U la ong ruh ba ki shait don ki briew kiba ong ba ka politik ka long kaba jakhlia, kaba ïa pait ïa pra, ka bym biang, ka kam jong ka pyrthei ba ymdei ban pynïakhleh bad ka hynrei u la pynpaw ka jingnguh ïa U Blei ba U la pynsngew ha u ban ïeng rasong ban ïa khun bad ban pynbha bad pynjanai ïa ka synshar ka khaddar.
“Haba nga ruh nga wan na ka longïing kaba duk, nga sngewthuh biang biang ruh ïa ki jingeh ba ki paidbah ki mat ha ka jingïaid lynti jong ki bad khamtam eh ha kaba ïa dei bad ki nongrep ba u mar rep kum u synsar u hiar ka dor ka mur”, u la ong. Namarkata, haba u ïoh ïa ki jingeh jong ki paidbah um lah ban shu hun da kaba shongkli kti hynrei u la shim ka rai ban trei met bad mynsiemmynsiem, trei shitom ha kaba la dei ka mon jong U Blei ma u kum u kyrtong uba poi sha ka thong un sa leit ban pynsngew ïa ki jingeh jong u paidbah hapoh Parliament.
U la pynkynmaw ruh ba ki MLA ki la dep ban phah ïa ka jingrai (resolution) ban dawa ïa ka ILP bad ban pynrung ïa ka ktien Khasi bad Garo hynrei haduh mynta ka dang jah rngai bad kumjuh ruh ban nym pyntreikam ïa ka MMDR Act hynrei ïa kane ruh dang sngap man man khlem ong ei ei. Shuh shuh u la pynsngew ba kiwei ki party ki ong ba lada jied ïa ki kin wanrah ïa ka dud bad ka ngap, hynrei u bah Robert u kren da kaba shai ba ym donkam dud ym donkam ngap hynrei kaba donkam ka dei ka aiñ ka ban ïada ïa ka ri bad ka jaidbynriewjaidbynriew kumta kaba donkam ka long ba ngi dei ban trei shitom ban synsar da lade ïa lade.
U bah Robertjune Kharjahrin u la pynkynmaw ruh ba ki don kiba kren beiñ ïa ka party riewlum ba ki kut tang hapoh Khanapara hynrei haba pule bha ïa ka khana pateng jong ka mynnor, ki nongïalam kiba dei na ka party riewlum ki don haduh lai ngut ki MP bad uwei na ki u dei na West Khasi Hills District. Namarkata, u la kyntu ba ki paidbah kim dei ban shu kren kulmar, hynrei ki dei ban pyrkhat biang biang ba kin synshar da lade ïa lade.
Kiwei ki nongkren ki long u bah Jeslan Roy Nongsiej kum u Secretary jong ka RDA, South West Khasi Hills District, u bah Tirotsing Suchiang, Joint Secretary UDP Central Body, ka kong Badarity Lyngdoh Nonglait ka khun pyrsa jong u bah Hopingstone Lyngdoh (bam kwai ha dwai U Blei) bad u bah Pius Marweiñ, MLA ka Ranikor Constituency bad kum u Chairman RDA, South West Khasi Hills District.