Hadien bun snem ka jingangnud ïohlad ki kali ban ïaid ha ka surok Mawrap – Nongnam, SWKHs District

Mawkyrwat, Risaw 23: Ka Shnong Nongnam ka dei kawei na ki shnong barim tam napdeng kine ki san tylli ki shnong (Nongman, Mawkhyrwang, Mawbri, Mawtangden bad Lum Pyngngad), kaba la don palat 150 snem ei ei. Watla ka shnong ka la rim bha, hynrei ki nongshong shnong ki la angnud la slem bha ban ïoh ïa ka surok kaba pynïasoh bad kiwei pat ki shnong, namar ha ki por mynshwa ki hap ban ïaid da ka kjat haduh saw kynta tam ban poi na Nongnam sha Mawkyrwat ha kaba ki hap ban kiew ïa ki thiep ki jaw.
Haba kren bad u bah Staland Thongni uwei na ki riew rangbah jong ka shnong Nongnam, u la ong ba ki san tylli ki shnong kiba la ïoh ban ïaid da ka surok ki kynthup ïa ka Nongman, Mawkhyrwang, Mawbri, Mawtangden bad Lum Pyngngad. Hadien bun snem ba ki nongshong shnong ki hap ban pynshitom ban ïaid da ka kjat, hynrei mynta ki la ïoh pat ban pyndonkam da ki kali ban leit sha ki jaka bapher bapher na ka bynta ki kam ki jam bad ban kit ïa ki mar ki mata.
U la ong ruh ba ka jingangnud jong kine ki shnong ban ïoh surok ka la sdang ha ka por ba u (L) Rowel Lyngdoh, MLA barim jong ka Mawkyrwat Constituency, bad kum u Symbud Myntri Rangbah ka Sorkar Meghalaya ha u snem 2018. Ha kata ka por, u la shimkhia ban ïalam ïa ki nongïalam shnong sha Secretariat, Shillong, ban ïakynduh bad ki bor ba dei peit, khnang ban pynurlong ïa ka jingangnud jong ki nongshong shnong. Watla u (L) Rowel Lyngdoh bad ki nongïalam shnong ki la pyrshang katba lah ban pynïoh ïa kane ka surok, hynrei kam shym la urlong ha kata ka por.
“Kawei na ki daw ba kane ka kam kam shym la poi sha ka thong ka dei namar ki jingeh bapher bapher, kynthup ïa ka jingbym lah jong u contractor ban pyndep ïa ka kam katkum ka por ba la buh. Watla la ai por haduh san snem, hynrei ka kam, kam shym la urlong katkum ka jingmang ba la buh”, ïathuh u bah Staland Thongni.
Shuh shuh u bah Staland Thongni u la ong ruh ba ka kam shna surok na Tynnai ha Mawrap ka la long hapoh ka jingpeit jong u (L) Bires Nongsiej, uba la long MLA ha ki snem kiba la leit noh. Katba ka bynta surok na Mawrap sha Jerlang pat la pyntrei lyngba ka Border Area Scheme, ha kaba la mang pisa T. 28 lak. Hynrei hadien kata, ha ka por ba u Bah Wen Marweiñ ula shimti pat kum u contrator, ka jingtrei ka la long tang ha ka jingpynbha ïa ka surok kaba la don lypa pynban kane ruh kam shym la pynhun ïa ka jingkwah jong ki paidbah nongshong shnong.
Namarkata, u la pynpaw ba watla ki nongshong shnong ki la duh jingkyrmen na ka jingbym lah jong ki contractor ban pyndep ïa ka kam ba la bynshet, hynrei ka jingkmen ka la wan pat ha ki ha ka por ba u Bah Renikton Lyngdoh Tongkhar u la long u MLA jong ka Mawkyrwat Constituency ha kaba na ka liang jong u, ula shimkhia ban leit ïakren bad tynruh ha ka miej jong u Symbud Myntri Rangbah ka Jylla, u Bah Prestone Tynsong, ban pynim biang ïa ka mang pisa na ka bynta ban pynpoi ïa ka surok na Mawrap sha Nongnam.
Ha kawei pat ka liang, u bah Staland Thongni u la ong ba hadien ba la ïoh ban thung sa ïa uwei pat u contractor, kata u Bah Bungsing Sohphoh, uba la sdang ïa ka kam shna surok ha u bnai ‘Nailur (September) 2024. “Da ka jingtrei shitom bad ka jingïaid shaphrang jong ka kam hapoh ka jingpeit jong u Bah Bungsing Sohphoh, ha ka 23 tarik u ‘Naiwieng (November) 2025, ka surok ka la poi haduh ka shnong Nongnam, kaba la long ka jingkyrkhu kaba khraw ïa ki nongshong shnong hadien bun snem jong ka jingap khmih lynti”, la pynpaw u bah Staland Thongni.
Namarkata, u la ong ba ka jingpynurlong ïa kane ka surok ka la long ka jingjop kaba kongsan ïa ki nongshong shnong jong Nongnam bad ki shnong kiba marjan, namar ka pynsuk ïa ka leit ka wan, ka kit ka bah, bad ka jingïoh lad ban pyndonkam ïa ki jingshakri bad ki lad jingïarap bapher bapher. Kane ka jingjop ka la pyni ruh ïa ka jingïatreilang hapdeng ki nongshong shnong, ki nongïalam shnong bad ki nongmihkhmat paidbah ban pynurlong ïa ki jingangnud jong ki paidbah.
Ha kawei pat ka bynta, u bah Staland Thongni u la ong ba hooid ka surok ka la poi ha shnong hynrei ka donkam pat sa ban siang rong pyndep noh naduh Mawrap sha Nongnam khnang ba kan long ka jingmyntoi bad kham pynsuk shuh shuh ïa ki paidbah. “Ngi kyrpad ruh ïa ka sorkar lyngba ka tnad PWD (Roads) bad ïa u Myntri ba dei peit ïa ka tnad PWD (Roads) ba ki dei ban mang pisa shuh shuh ha kaba ïa dei bad kane ka surok namar ki don ki jaka ba ki dang i donkam ban hap ban leh bad trei khnang ba kan nym buh jingma ïaid ka ïeng jong ki paidbah khamtam lada dei ha ki por lyiur.