Ki bor ka aiñ kin thwet jur ïa ki runar ba donkti kawang petrol bom ha Shillong: Dy.CM

Shillong, Risaw 23 : U Symbud Myntri Rangbah ka Jylla ba khmih ïa ka tnat Kam Pohiing u Bah Prestone Tynsong u la ïathuh ba ki bor ka aiñ ki la buddien ïa ki briew kiba donkti ha ki jingkawang bom petrol kiba la jïa ha Shillong ha kine ki khyndiat sngi ba la dep.
Haba kren bad ki lad pathai khubor, u Symbud Myntri Rangbah u la ïathuh ruh ba ka sorkar ka la pynkhreh ban pynjur shuh shuh ïa ki bor pahara ban pyntikan ïa ka jingshngain jong ka nongbah.
“Ka ain kan buddien ïa kine ki kam kawang petrol bom bad ki kam runar kiba jia man la ka sngi ne man ka miet. Ngin leh da kaba tyngeh pyrshah ia kino kino ki kam kiba long pyrshah ïa ka shong shongsaiñ bad kiba wanrah ïa ka jingshong syier khamtam eh ha nongbah Shillong,” la ong u Symbud Myntri Rangbah.
Kane ka jingkren jong u Symbud Myntri Rangbah ka dei hadien ba ka sorkar ka la shong ïa ka jingïalang buddien ha ka sngi Palei.
“Mynta ka sngi ngi la pynlong ïa ka jingïalang ban bishar bniah bad na ka liang ki bor distrik ki la trei shitom halor kane,” u la ong.
Ha kajuh ka por u Symbud Myntri Rangbah u la pyntip ba la dep ai jingbthah ïa baroh ki ophis bad ki jaka treikam kiba don hapoh bad sawdong ka nongbah Shillong ba kin long kiba phikir bha, ban buh ïa ki CCTV bad ban pynthikna ba ki kali bad ki mar jong ka Sorkar kin long kiba la buh ha ki jaka kiba shngaiñ.
“La bthah ïa baroh ki ophis bad ki jaka treikam kiba don hapoh bad sawdong ka nongbah Shillong ba kin phikir bha bad ban pynthikna ba ki don ki CCTV kiba biang. Ki kali Sorkar bad kiwei kiwei ki jingdon jingem jong ka Sorkar ki dei ban don ha ki jaka kiba shngaiñ, khnang ban kiar na kum kine ki kam runar,” u la ong.
Shuh shuh da kaba pynskhem ba yn ym mab ïa ki nongleh kam runar, u la ong, “Ka Sorkar ka kut jingmut ban lap ïa ki briew kiba donkti, bad ka aiñ kan ïai buddien ïa ki. Ngim banse ban pynshitom ïa uno-uno lada lap ba u donkti ha kum kine ki kam beaiñ bad ki kam runar.”
Haba kylli la don ne em kano-kano ka kynhun kaba donkti ha kine ki jingjia, u la ong ba katkum ka jinglong jong ki jingjia haduh mynta, ki paw kum ki kam runar kiba jia marwei.
U Symbud Myntri Rangbah u la bynrap ruh da kaba ong, “Ngi la pan shuh ïa ki bor pahara kiba kham bun, bad hapoh kine ki khyndiat sngi, ngin sa ïoh shuh ïa ki bor pahara ban nang pynkhlaiñ ïa ka jingshngaiñ ha Shillong.”