Lajan shisnem mynta ka sorkar ka shu sngap jar jar khlem paw dak ei ei, lah ban ujor ha u CM: FKJGP

Mawkyrwat, Risaw 22: Ka Federation of Khasi Jaiñtia and Garo People (FKJGP), Ranikor Circle, mynta ka sngi ka la ïakynduh bad ïamir jingmut lang bad ki lanot nongrep na ka dong ka thaiñ Ranikor kiba la mad ïa ka jingjulor jong ki mar rep bad ki ïing ki sem jong ki na ka jingwan rung jong ki hati khlaw ha ka snem ba la dep bad ha kine ki khyndiat bnai ba la dep.
Katkum ka jingïathuh jong ki nongrep, ka tnat Wildlife jong ka Sorkar ka la dep ban wan jurip ïa ki jaka rep kiba shah pynjulor bad ka la pan ruh ïa ki account (A/C) bad ki kot ki sla kiba donkam na ki nongrep, da ka jingkular ban ai jingïarap. Hynrei, haduh mynta, la jan shisnem ki nongrep kim pat ïoh satia ïa kano kano ka jingïarap na ka Sorkar.
Ha kane ka jingïalang, ka Federation of Khasi Jaiñtia and Garo People (FKJGP), Ranikor Circle ka la ïoh ban ïamir jingmut bad ïa kren bad ki nongrep halor ki jingeh kiba ki la mad, khamtam ha kaba ïadei bad ka jingduhnong kaba ki la shah lyngba ka jingpynjulor jong ki hati khlaw ïa ki marrep bad ki ïing ki sem jong ki.
Na ka liang ka seng, ka la kyntu ïa ka Sorkar Jylla ban shimkhia bad ban pynpoi noh mardor ïa ka jingïarap sha kine ki lanot nongrep kiba la shah ktah shibun. Ka seng ka la pynpaw ruh ba kan sa leit ban ïakynduh ïa u Myntri Rangbah ka Jylla, u Conrad K. Sangma, ban dawa ba ka Sorkar kan shimkhia ïa kane ka kam bad ban pynsted ïa ka jingïarap sha ki lanot.
Ka seng ka la pynpaw ba ka Sorkar ka ju kyntu ïa ki samla ba kim dei ban shaniah tang ha ki kam sorkar, hynrei ki dei ban trei shitom bad ban ïeng ha la ki jong ki kjat, khamtam ha ka kam rep kam riang, khnang ba ka Jylla kan lah ban kyntiew ïa ka jingmih jong ki mar rep bad ban pynduna ïa ka jingshaniah ha ki marbam kiba wanrah na shabar.
Hynrei, ka seng ka la buh jingkylli ba kumno ka Sorkar kan lah ban pynshlur ïa ki nongrep ban pynheh bad pynroi ïa ka kam rep kam riang, lada kam lah ban ai jingïarap ïa ki haba ki ïakynduh ïa ki jingeh kiba khraw kum kane ka jingjulor jong ki mar rep na ka jingwan rung jong ki hati khlaw.
Ka FKJGP Ranikor Circle ka la ong ba ha kane ka kynti, kan ap shwa ïa ka jingïakynduh bad u Myntri Rangbah ka Jylla ban ïohi la ka Sorkar kan shimkhia shisha ne em ïa kane ka kam bad la ka jingïakynduh kan wanrah ïa ka jinghun jingpynhun ïa ki lanot nongrep.
Hynrei, lada ka jingïakynduh kam lah ban pynhun ïa ki nongrep bad kam wanrah ïa kano kano ka jingmih kaba bha, ka seng kan sa shong pyrkhat ban shim ïa ki sienjam kiba kham tyngeh. “Lada ka jingïakynduh kam sei soh kan poi ruh ka por ba kin sa mih sha madan ban pynpaw ïa ka jingsngew jong ki nongrep bad ban dawa ïa ka hok jong ki”, ong ka seng.
Ka seng ka la pynpaw ruh ïa ka jingsngewkhia halor ka jingbym ïoh jingïarap jong ki nongrep hapoh ka Jylla, wat hapdeng ka jingshah pynjulor jong ki mar rep bad ki ïing ki sem jong ki. Ka la buh jingkylli ruh ïa ka Sorkar ba lada ka lah ban pynbiang ïa ki klur tyngka ban ai jingïarap ïa ki lanot kiba shah ktah ha ki jingshlei um ha kiwei pat ki jylla, kum ha Assam, balei pat kam lah ban ai jingïarap ïa la ki jong ki paidbah hapoh ka Jylla kiba mad ïa ki jingeh kiba kum kine.
Ka seng ka la ban jur ba ka Sorkar ka dei ban shimkhia ïa ka jingeh jong ki nongrep bad ban pynurlong noh ïa ka jingïarap kaba ki la khmih lynti la slem, khnang ba kin lah ban sdang biang ïa ka kam rep kam riang bad ban kyrshan ïa ka jingim bad ki longïing longsem jong ki.