Ïoh jingmyntoi ki khynnah skul ka JKMPHSSM ha ka Students Exposure Trip ba la pynlong da ka PHED Mawkyrwat Division

Mawkyrwat, Risaw 19: Ka ophis jong u Executive Engineer, PHED, Mawkyrwat Division, lyngba ka Jal Jeevan Mission 2.0, South West Khasi Hills District, ka la pynlong ïa ka prokram ba ki la ai kyrteng “Students Exposure Trip” na ka bynta ki khynnah skul jong ka Jingïaseng Kynthei Mawkyrwat Presbytery Higher Secondary School, Mawkyrwat, halor ka phang, “A Journey of Water from Source to Tap”, lane “Ka jingïaid lynti jong ka um naduh ka tyllong haduh ki kor sam um ha ki ïing ki sem”.
Ha kane ka prokram, u bah K. Nongbsaw, Executive Engineer, ryngkat u bah I. Kharbudon, Sub-Divisional Officer (SDO), u bah T.Lyngkhoi, Junior Engineer (JE) bad u bah Steven Wahlang, District Programme Manager (DPMU), JJM bad ki khynnah skul, ki la leit jngoh ïa ka jaka dam um ha Photsala. Hadien kata, ki la leit ban peit ïa ka jaka pump um bad ka jaka pynkhuid um jong ka Greater Mawkyrwat Combined Water Supply Scheme, kaba don ha ka shnong Mawten, khnang ban ïoh jingshemphang bad jingsngewthuh shaphang ka rukom lum, tan bad pynkhuid ïa ka um shwa ban sam sha ki nongpyndonkam.
Ha kane ka sngi, la ai jingpynshai kaba bniah sha ki khynnah skul bad ki nonghikai halor ka jingdonkam ban pynneh pynsah ïa ka um, ban sumar ïa ki tyllong um bad ïa ki jaka lum um (catchment areas), khnang ban pynthikna ïa ka jingdon jong ka um kaba khuid, kaba biang bad kaba lah ban pyndonkam ïa ka um na ka por sha ka por.
Ha kane ka sngi la ïoh ruh ka pynshai ruh ïa ki khynnah skul shaphang ka rukom treikam jong ka jaka tan um (Pumping Station) bad ka jaka pynkhuid um (Water Treatment Plant – WTP).Nalor kata, la pyni ha ki ïa ka jingïaid lynti jong ka um naduh ka Main Collection-cum-Withdrawal Reservoir (MCWR) sha ki Zonal Clear Water Reservoirs (ZCWR), bad nangta sha ki ïing ki sem, ki skul bad ki jaka sumar lyngba ki kor sam um.
Lyngba kane ka jingleit jngoh bad ka jinghikai kaba ïadei bad ka jingpyndonkam ïa ka um ha ka jingim ba man ka sngi, ki khynnah skul ki la ïoh ïa ka jingtip kaba kham bniah shaphang ka rukom treikam jong ka water supply scheme, naduh ka tyllong um haduh ba kan poi sha ki nongpyndonkam ne sha ki longïing. Kane ka prokram ka la ai lad ruh ïa ki ban sngewthuh kham bha ïa ka jingkordor jong ka um bad ka jingdonkam ban ïada bad pynneh pynsah ïa ki tyllong um.
Na ka liang ki nonghikai bad ki khynnah skul, ki la pynpaw ïa ka jingsngewnguh ïa ka PHED, Mawkyrwat Division, halor ka jingpynlong ïa kane ka prokram kaba la ai jingtip bad jinghikai, kaba la ïarap ïa ki ban pynïar ïa ka jingsngewthuh shaphang ka jingkordor jong ka um bad ka jingdonkam ban pyndonkam hok ïa ka.