Ka jylla ka don haduh 3000 MW ka bording hynrei mynta dang lah ban pynmih tang 367.50 MW

Shillong, Rymphang 28 : U Myntri ka tnad pynmih bording ka jylla u Abu Taher Mondal ha ka Sngi Ba Ar u la ong ba jylla Meghalaya ka don ka bording kaba lah ban pynmih haduh 3000 MW hynrei kat haduh mynta dang lah ban pynmih bording tang 367.50 MW kaba long dang tang 11.8 % na ka jingdon ka bording hapoh ka jylla.
ïa kane u la jubab ha ka Unstarred Question kaba la wanrah hapoh ka ïing dorbar ha ka Sngi Ba Ar. U la ïathuh ka sorkar jylla ka pyrshang ban ïoh ïa ki skhim na ka tnad Ministry of New and Renewable Energy (MNRE) na ka bynta ban tei bad sorjamin na ka bynta ki Hydro Project kiba rit hapoh ka jylla.
U la ïathuh ia ka Lakroh Small Hydro Project, Ganol Small Hydro Project bad Riangdo Small Hydro Project la tei lyngba ka jingïoh jingïarap na ka tnad MNRE.
Kumba long mynta ki don haduh 15 tylli ki Small Hydro Project kiba la dep pynkhreh ïa ka Detailed Project Report bad shen yn sa ïoh jingïarap na ka tnad MNRE ban ïoh sdang ka jingpyn trei ïa ki.
U Mondal u la ïathuh ruh kumba long mynta ka MePGCL kam pat don ki projek ban pymih bording na ka Lyer (Wind) ne na ka Sngi (Solar Power) Na ka liang ka sorkar jylla ka la ïasoi ïa ka MoU bad ka National Thermal Power Corporation Limited (NTPC) ha ka 10 tarik u bnai Naitung 2023 bad kumjuh ruh bad ka ONGC Tripura Power Company Ltd (OTPC) ha ka 10 tarik Kyllalyngkot 2024 ban sorjamin bad bishar bniah ha kino ki jaka ba lah ban tei ia kine ki projek pynmih bording ha ka jylla.