Ka Minimum Wage kaba la buh da ka Sorkar Meghalaya kam treikam ha WJHD kynnoh ka HYDC
Shillong, Risaw 25: Ka Hynniewtrep Youth Development Council (HYDC) West Jaintia Hills District ka la pynlong ïa ka Labour and Employment Survey ha West Jaintia Hills District ha ka sngi, Saitjain kata ha ka 24 tarik u Risaw 2026, ban lum jingtip shaphang ka jingioh kam bad ka jingtrei jong ki nongshong shnong hapoh ka district.
Ha kane ka jingpynlong ïa ka survey, la don ryngkat u Bah Shemborlang Thabah, Member ka CEC, bad la ialam ïa ka survey da u Bah Firmly Ryngkhlem, President HYDC West Jaintia Hills District, ryngkat bad u Bah Martin Ryngkhlem, Secretary ka seng, bad kiwei kiwei ki dkhot jong ka HYDC West Jaintia Hills District.
Ha kane ka survey kaba ka seng ka la sdang naduh Phramer ter ter shaduh Jowai, ka seng ka la shem ba bun na ki nongtrei kiba trei ha ki Dhaba, Petrol Pump bad Shopping M all ki dei kiba wan na shabar jylla, khamtam eh na ka jylla Rajasthan.
Ka jingbun jong ki mynder ba ioh kam ioh jam hapoh ka Bri Hynniewtrep ka la buh jingeh kaba khraw ïa ki khun samla jong ngi ha ka liang ka jingioh kam.Ka seng ka ngeit ba ka jingdon bun jong ki nongtrei na shabar jylla ka long ruh kawei na ki daw ba ki khun samla ka jylla kim ioh lad satia ban bylla ban sngi hala ka jong ka ri.
Kawei pat ka mat kaba ka seng ka sngewkhia bha ka long ba ka minimum wage kaba la buh da ka Sorkar Meghalaya kam shem la treikam ha West Jaintia Hills District.Ka Minimum Wage Act ka long kum ka ain kaba la shna tang ban shu buh sah jingkynmaw.Ka seng ka la shem ba bun na ki nongtrei trai ri ki ioh ia ka tulop kaba Rs 4000 haduh rupees 8000 kaba ka por trei kam pat ka long ha 10 ne 12 ryngkat.
Da kane ka kyrwoh, ka seng ka kwah ban pynpaw sha ka Sorkar Meghalaya ba ka jingdawa jong ka HYDC ban thaw noh ia ka Comprehensive Employment Policy ka dang iaid bteng. Ka jingpynlong ia ki labour bad employment survey ruh ka dang iaid shakhmat ha ki district bapher bapher jong ka Bri Hynniewtrep, khnang ban lum ia ki jingshisha bad ki jingtip kiba bniah shaphang ka jinglong jingman jong ka employment ha ka jylla.
Ka seng ka ngeit skhem ba hadien ba la dep lum bad submit ia ki jingtip na baroh ki district, ka Sorkar Meghalaya kan shim ia ka sienjam kaba donkam ban thaw noh ia ka Comprehensive Employment Policy, kaba lah ban ai ia ki lad ban ioh kam ioh jam ki khun samla ka bri u Hynniewtrep.