Ym dei ban sngewthuh bakla ïa ka jingkiew kynsan ka seng BJP sha 10 ngut ki MLA

Shillong, Risaw 25: U MP ka Rajya Sabha uba long ruh u nongialam ka seng NPP u James K Sangma ula ong ba ka jingkiew kynsan jong ka BJP na ki 2 ngut sha ka 10 ngut ki MLA hadien ka jingleit pynïasoh ki 8 ngut ki MLA ka UDP kadei shi bynta jong ka jingkylla ha ka kam saiñ pyrthei hynrei ym dei pat ban sngewthuh bakla bad ka jingjied ki paidbah ha ka por elekshon kaba ki la pynlut ïa ka por.
Halor kane, haba kren halor katei ka jinglong jingman, u James Sangma ula ong, ba ka jingphet seng kadei kaba lah jia khah khah ha ka kam saiñ pyrthei ha ri India baroh kawei.
U la bynrap da kaba ong, “Kane baroh kadei ka politik. Ki briew ki leit rung na kawei ka seng sha kawei pat, kine ki jingjia kidei kiba ju ïai jia ha ka kam saiñ pyrthei hapoh ri India. Ngi lah ïai sakhi ïa kane man la ka por hynrei ka ïapher pat na ka jingjied jong ki paidbah ha ka por elekshon kaba ju long manla ka por.”
Katkum ka jingong ka jong James, ka jingthew kaba shisha hi ïa ka jingkhlaiñ jong ka seng kan shong eh ha ka jingïoh Vote ha ka por ba pynlong ïa ka elekshon.
U la ong, “Ngi donkam ban thew ïa kaei kaba mih ka resol ha ka por elekshon bad ka long kaba kongsan ban peit ïa ka na ka mat ha ka por ba long ka elekshon, haduh katno la ïoh ïa ki vote da man la ki seng saiñ pyrthei.”
Shuh shuh haba kylli la kane ka jingkiew ka BJP ha ka jingdon ïa ki MLA kan ktah ne em ïa ka NPP, ula ong, ba ka jingïatynjuh hapoh ka ïingdorbar bad ka jingïoh jingkyrshan ha ki shnong ki thaw ki treikam ha la ki jong ki jong ki jaka.
U la bynrap, “Ka jingkylla ha ka jingkhlaiñ ka seng ha kaba ïadei bad ka jingmihkhmat hapoh ka ïingdorbar kan wanrah ïa ka jingkylla ha ka jinglong jingman. Hynrei haduh katno kane kan wanrah ïa ka jingkylla ha ki shnong ki thaw bad ka jingkhlaiñ ka seng ha ka por elekshon, kine kidei ki artylli ki bynta kiba ïapher kawei na kawei pat. Hooid, ha kawei ka bynta kan wanrah ïa ka jingktah hynrei ha kawei pat ka liang, ka lah pat ban ym don satia kano kano ka jingktah.”
Haba kylli halor ka jingsaphriang ki khubor ban pynhiar shuki noh ïa u Bah Metbah Lyngdoh na ka Kynhun Myntri, u James ula kyntait ban kren eiei halor kane.
U la ong, “Nga ngam ïa donbynta eiei bad ka sorkar. Nga dei tang u Member of Parliament (MP). Kine ki jingkylli dei ban buh ïa ka Sorkar Jylla, ïa ki Myntri Sorkar ne ïa u Myntri Rangbah.”
Na ka liang jong u, ula ong shuh shuh da kaba pynpaw, “Hato ka don kano kano ka rukom pyrkhat hapoh jong ka seng NPP ban ailad ïa kiba dang rung thymmai sha ka seng ban ïoh khusnam, kan don beit ka rukom pyrkhat hapdeng ki nongkitkam ka seng. Ha ka jingpyrkhat shimet nalade hi, ngam lah ban ong eiei. Kumba nga ong, ngam don bynta eiei bad ka Sorkar, bad kane ka dei ka kam jong ka sorkar jylla bad u Myntri Rangbah.”