Shillong, Rymphang, 28: U nongïalam ka Congress legislature party (CLP) Bah Ronnie V Lyngdoh ha ka sngi Balang u la kynthoh tyngeh ïa u MLA ka BJP na South Shillong u Bah Sanbor Shullai da kaba kynnoh ba um ju kren eiei wat shikyntien ruh ha Assembly.
Kane ka jingkynthoh, ka long hadien ba u Bah Sanbor u la kynnoh ba u Sitting MP ka Congress na Shillong u Bah Vincent H Pala um ju leh eiei ïa ka constituency hynrei, ‘u shu pynlut kai ïa ka por ha kaba bam sohot san snem kynthih ha Parliament.”
“Wad ma phi, katno sien u Bah Sanbor Shullai u leit sha Assembly. Katno sien u la kren ha Assembly?” la ong u Bah Ronnie Lyngdoh ha ka jingïakren bad ki lad pathai khubor.
“Halor ka jingtreikam jong u Bah Pala, nga tharai ba bun ki kam u la leh. U dei u briew uba jar jar. Um ju pynpaw paidbah kumba leh katto katne ki politishian. Bun ki kam kiba u la leh na ka bynta jong ngi bad nga tharai bun ki projek kiba la wanrah sha ka Jylla Meghalaya lyngba ka jingtrei shitom jong u,” u la ong.
“Hynrei ka jingkynnoh jong u Bah Sanbor ka sting kdor kdor namarba ïalade lei um ju kren hi ruh hapoh ka Ingdorbar bad um ju kham poi sha Ingdorbar. Hato phi la ju ïohsngew ba un kren hapoh ka Ingdorbar? Ban shu wan sha Ingdorbar bad ban ym kren eiei kan bha ba u shong ha ing. Namarkata ka jingkynnoh jong u ka sting kdor kdor namarba um shym la bud ïa ki kyndon pynïaid kam jong ka Parliament ha kaba u Bah Vincent Pala uba dei u MP na Shillong u ju ïashim bynta hapoh ka Ingdorbar ban kren ïa ki mat kiba ïadei bad ka Jylla Meghalaya,” u la bynrap.
Halor ka jingkynnoh ba u Bah Pala um ju pynlong ïa ka jingïalang jong ka DISHA ha ka Constituency, u Bah Ronnie u la ong ba ngi dei ban sngewthuh ba ha ki 2-3 snem ba ladep, ka don ka khlam jingpang Covid-19 bad ki don bun ki skhim kiba ka Sorkar India kam shym la pyllait. U la kdew ruh ba ka mang tyngka na ka bynta ka MGNREGS and bad na ka bynta ki kam pynroi sha ki nongkyndong ki la shah khate lut.
“Ban shu pynlong tang ïa ka jingïalang khlem don eiei ban ïakren, kam don jingmut eiei,” u la ong.
