Na ka jaka ba sei ïa u Prah, sdang ïalap elekshon MP ka VPP, ther u Bah Ardent ïa ka Sorkar MDA

Shillong, Rymphang 28: Na kajuh ka jaka kaba la sdang ïalap elekshon MLA ha u snem 2023, ka Voice of the People Party (VPP) mynta ka sngi ruh ka la sdang ïa ka jingïalap elekshon MP bad kane ka jaka kadei ha ïew Smit.
Lah ban kdew hangne ba ka VPP ka la pynbna paidbah ïa u Symbol jong ka Party (U Prah) ha kane hi kajuh ka jaka ha shuwa ban sdang ka jingïalap elekshon MLA 2023.
Ryngkat u paidbah uba da ki hajar ngut, u Bah Brighstarwell Marbañiang, MLA Mawlai, u la ong ba ka VPP ka kwah ba ka elekshon MP kan sdang jong ka jingjop ka ban bud sa ka MDC Elekshon bad kaba khatduh kan dei ban kurup noh ïa ka bor ha u snem 2028, namar ba la sngewlehraiñ wat ban leit shabar ruh, haba ki briew ki ong ‘phi wan na ka jylla kaba bamsap bad kaba duk tam mo’.
“Kum u nongshong-shnong kane ka jylla teng teng la sngew lehraiñ shabar jylla namar ki briew ki ong phi wan ka jylla kaba bamsap tam, kaba duk tam mo”, la ong u MLA Mawlai.
Namarkata u wer ïa ki paidbah ban tre shitiom ban pynjop noh ïa ka VPP da kaba sdang naduh ka elekshon Lok Sabha, nangta bud sa ka elekshon MDC bad haduh ha ka elekshon MLA ha u 2028.
U Dr. Ricky Syngkon, General Secretary bad kyrtong MP ka Party, u la ong ba don ki briew kiba ong ïa u, balei ba u ïalap niam ha ka rynsan saiñpyrthei ruh. Hynrei u la ong ba ka VPP ka la ju ong ba ka saiñ hima sima kadei ka kam kaba kyntang kaba la buh beit buh ryntih da U Blei bad kum u briew uba thrang ban wanrah ïa ka synshar ka khadar kaba khuid, donkam ban pynshong nongrim ruh katkum ka jingbuh beit U Blei lyngba ka Ktien kaba khuid jong U.
“Hato ban hikai ïa ki briew ban kylla na kaba sniew sha kaba bha, kadei ka jingïalap kaba ïalam bakla, hato ban hikai ïa ki briew ban im ka jingim kaba bha, kadei kaba ngi ïalap ïa kaba sniew seh?”, la ong u kyrtong ka VPP.
U Dr. Syngkon, u la pynpaw ka jingsngewkhia halor ka jingsahdien jong ka jylla, wat hadien 52 snem ba ka la ïoh la ka jong ka jylla bad ki paidbah ki mad jingeh namar ba kim ïoh ïa ki jaka sumar kiba biang, ki samla ki mad jingeh namar ba kim don ki jaka pule kiba biang. “Kum ka Party ngin ïai trei na ka bynta ban wanrah ka jingkylla ha ka imlang sahlang, ha ka jingim jong ki briew shimetm ha ki shnong ki thaw, ha ka Balang bad kumjuh ruh ha ka synshar ka khaddar”, la ong u Nonghikai jong ka NEHU.
U Bah Ardent ha ka jingkren jong u, u la ong ba namar ba ki paidbah kiba bun mynta ki la phai khmat lut sha ka VPP, shen kan da don ka jingpynbit ktieh ïa ki nongïalam jong ka Seng. Hynrei u la ong, ba ka VPP ka don pat ïa ki paidbah kiban ïarap ban pynñiad bad ban pynkhuid ïa kane ka ktieh.
Da ki jingai nuksa kiba u ju ai ban pynsngewtynnad ïa ki paidbah, u Bah Ardent u la ong, “Mynta te phi ïohi u Bah Ardent bad ki nongïalam ka VPP ki khuid bad itynnad bha, hynrei satang katto katne por kin sa shah pynbit ktieh baroh shi rynïeng, hato phin kiar noh na ngi tang shu ïohi ba ngi bit ktieh? ne phin ïarap ñiad bad pynkhuid ne?”, u la ong. Ki paidbah ruh ki la pyrta, “Ngin pynkhuid”.
U Nongïalam ka VPP u la kren bynñiaw ïa ka jingpynbiej ka sorkar ïa ki paidbah da ki skhim bapher bapher kum kata ka CM Elevate, ka skhim Kali ban kit tourist, hynrei u la ong pat ba ki paidbah kim dei ban bieij, namar kine ki jingiarap ba ka sorkar ka ai kidei da kaba ka shu shimram, kaban nang pynkit ram shuh shuh ïa ka jylla. “Hato ngi kmen, ngi hun ba ka jylla kan shu kit beit da ka ram baroh shi lynter?”, u la ong da kaba ïatuh ruh ba ka ram jong ka jylla mynta ka la kot sha ka 13 hajar klur tam.
Hynrei wat hapdeng kane ka jingkitram, dang don pat ki nongmihkhmat paidbah kiba ïathuh khyllew ba ki wan shangkai sha bar ri, katba ki paidbah ka jylla pat ki im hapdeng ka jingduk jingkyrduh.
U la kdew ruh ïa ki kam pyllut phut da kaba thungkam Chairman da ki spah ngut, nangta ka jingpynlong ïa ki tamasa kiba pher bapher, ka jingthied kali rem dor bad kiwei kiwei.
Namarkata ka daw u ong ba ki paidbah ym dei ba kin pynjop ïa ka VPP tang ha ka elekshon MP ne MDC, hynrei ban tei shitom lypa na ka bynta u 2028, namar ba lada kam wan ka jingkylla ha u 2028 ka jylla kan mad ïa ka jingeh kaba khraw.
U Bah Ardent u la pynpaw ruh ka jinglyngngoh ïa ka jingnud thok ki briew wat hapdeng ka juk jingtip bad ka juk shai kaba kat kane ruh, namar don kiba ong ba uta u MLA VPP u ïaleh aiu ha Assembly um ju ïakren eiei, katba ha surok pat u shu ïahylla pynshongshit.
“Ngam da donkam ban batai ngi kren aiu ha Assembly ba dang shu dep, phi ki paidbah phi ïa ïohi lut ha ki lad pathai khubor”, u la ong, da kaba kyntu ïa ki paidbah ba kim dei ban shah pynbieit bad shah pynngop ha ki jingïalam bakla ne ki kam thok.