Shillong, Rymphang, 28: Ka Meghalaya Pradesh Congress Committee (MPCC) ha ka sngi Balang ka la maham ïa ki paidbah nongshong shnong ka Jylla Meghalaya ban long kiba husiar bha ïa ka BJP bad ong ruh ba kim dei ban shah pynngop ha ki jingpynbiej jong ka BJP.
Ha ka jingïakren bad ki lad pathai khubor ha nongbah Shillong u Northeast Media Coordinator ka AICC u Matthew Anthony u la ong ba ka Congress ka la ïohi ïa ki jingleh bymhok jong ka Sorkar NDA ba ïalam da ka BJP naduh u snem 2014, kaba wanrah ïa ka jingkiewdor jong ki marbam mardih, ka jingshah leh bymhok ki jaidbynriew Schedule Caste, Schedule Tribe bad ïa kiwei ki jaidbynriew kiba dang sahdien.
U la ong ba ka jingshah leh beijot jong ki kynthei ka la nang ïai jia manla ka sngi ha kine ki 10 snem ba la synshar da ka BJP.
Haba mynjur ïa ki jingleh bakla jong ka Congress ha ki snem baladep, u Anthony u la ong ba ka party ka la pynbeit ïa ki jingbakla bad pynpaw ruh ïa ka jingshaniah ha ki paidbah ba kin ai jingkyrshan ïa ka Congress khnang ban pynkut noh ïa ki jingshah leh bym hok.
U Anthony u la kdew ruh ïa ka jingbym ïohkam ïohjam ha ri India khamtam ki samla kiba la nang la stad.
U la buh jingkylli ruh ïa ka rukom synshar ka BJP ha kine ki 10 snem khamtam eh ïa ka jingïaumsnam ha ka jylla Manipur.
Une u nongïalam ka AICC u la kam ruh ba 386 tylli ki ingmane Blei ki la shah pynpra bad 70,000 hajar ngut ki paidbah ki la kylla phetwir bad nalor kata, ka Sorkar u Narendra Modi kam shym la ai jingmynjur shuh ïa ka Foreign Contribution (Regulation) Act, 1976 kaba ki shlem treikam jong ki Khristan ha ka thaiñ North East ki ju ïoh ïa ki lad jingïarap pisa.
U la kynthoh ruh ïa ka jingïaumsnam ha ka jylla Manipur kaba la wanrah ïa ka jingïap briew kaba la kynjoh sha ka 170 ngut ha kine ki khyndai bnai ha kaba u Myntri Rangbahduh ka ri u Narendra Modi u donpor ba leit ïakren ïasuk ha ka ri Ukraine bad u donbor ban leit shang suwari kylleng ka pyrthei hynrei um don por satia ban shimkhia ïa ka jingïaumsnam ha ka jylla Manipur.
