Sdang dawa pisa ka Seng HNLC 20 lak shaneng kum ka ‘Income Tax’ na ki heh saipan

Shillong, Rymphang 28 : Ka seng Hynniewtrep National Liberation Council (HNLC) hadien ba ka la mih noh na ka miej jingïakren ïasuk mynta ka la sdang ban phah ïa ki shithi dawa pisa sha kiba bun ki briew khamtam sha ki heh saipan hangne ha ri lum Khasi bad Jaintia bad ka jingdawa ka long 20 lak tyngka shaneng kaba ka seng ka ong ba ka dei kata ka “Income Tax”.
Kat kum ka khubor ba la ïoh ba ki don kiba ïoh pdiang da ka shithi dawa pisa ka seng bad ki don pat kiba ïoh pdiang lyngba ka WhatApp ruh bad kiba phah ki pyndonkam da u number Phone Bangladesh.
ïa kine ki shithi dawa pisa bad WhatApp la phah da u Finance Secretary ka HNLC u M.Rynjah bad la pynpaw ba ka dei ka income tax bad ka dor ka long 20 lak tyngka shaneng. La mana ïa kito kiba ïoh pdiang ïa ki shithi dawa pisa ba kim dei satia ban pyntip da lei lei ruh sha ki bor pulit.
Ka tyllong khubor ka ïathuh ba kumba 60 ngut ki briew ba ïoh pdiang ïa ki shithi dawa pisa ki dei kiba na Ri Bhoi District, 40 ngut na Jaintia Hills bad 25 ngut hangne ha nongbah Shillong, East Khasi Hills. “ La ïoh jingtip ba ki don ki briew kiba la siew ïa kane ka jingdawa ka seng HNLC lyngba ki briew kiba la ai bor da ka HNLC ban leit lum pisa.
Kane ka jingdawa pisa jongka seng HNLC ka la jur hadien ba ka la weng na ka jingïakren ïasuk bad ka sorkar jylla bad sorkar pdeng. Ka seng HNLC ka la kynnoh ba ka sorkar kam shym la shim khia halor ki san tylli ki mat jingdawa ba la buh da ka seng khamtam ban map lut ïa baroh ki jingshah pynngat kyndon jong ki nongïalam bad dkhot ka seng.
Na ka liang ka sorkar na ka por sha ka por ka ïai kyntu ïa ka seng HNLC ban bishar bniah bad wan biang sha ka miej jingkren ïasuk hynrei kat haduh mynta ka seng HNLC ka dang sngap man man bad kam pat ai kano kano ruh ka jubab.