Nongpoh, Jymmang 25: Ki paidbah nongshong shnong jong ka shnong Kdonghulu ha Ri-Bhoi District mynta ka sngi kila leit mih syndon sha ka tnad treikam jong ka MePDCL ha Umiam ban ïakynduh ïaka Superintendent Engineer Ri Bhoi Distribution Circle ka Kong A. Majaw halor ka jingbym ioh bording ki paidbah katei ka shnong mynta la jan shi bnai.
Naka liang ki paidbah kila pynsngew ruh hakhmat katei ka ophisar baka bording kala duh kynsan ha katei ka shnong la jan shibnai bad ki paidbah ki hap ban shong hapdeng ka jingdum kaba la buh jingeh kaba khraw naduh ki kam ki jam ba ki paidbah ki hap ban pyndep khamtam ki samla pule kiba hap ban pynkhreh ïaki jingpule bapher bapher jong ki.
Haba kren sha ki lad pathai khubor naka liang ka kong Iaishah Rymbai hadien ka jingïakynduh bad ka SE ka tnad MePDCL kala ïathuh ba katei ka shnong kala duh bording naduh ka 3 tarik u bnai Jymmang bad naka liang ka shnong kala leit ruh ban pyntip sha ka tnad MePDCL Umiam haka sngi kaba bud hynrei kam shym la don kano kano ka jingshimkhia naka liang ki bor ba dei peit bala buh ïaki paidbah hapdeng ka jingeh kaba khraw.
Naka liang ka kong Iaishah Rymbai kala pyntip ruh hadien ka jingkynduh ïaka SE, kala pyntip ba ka daw ka jingduh bording ha katei ka shnong ka dei namar ka jingduh noh u transformer bad la donkam noh da u ba thymmai bad kan dang shim por sa kumba 10 sngi ban bujli da u ba thymmai bad kyrpad ïaki paidbah ban ïaishah shipor.
