Kem ki Pulit ïa uba kam kum u IB Officer na Wahingdoh, kurup ïa ka Bolero ba pyndait siren
Shillong, Jymmang, 25: Ki Pulit ka East Khasi Hills ki la ïohkem ïa u Bah Richard Tiplang Swer halor ka jingkam thok ba u dei u IB Officer jong ka Ministry of Home Affairs, Sorkar India.
“Ha ka 16 tarik mynta uwei u briew uba kam ïalade kum u IB Officer jong ka Ministry of Home Affairs u la tyrwa ban aikam ha Secretariat, Shillong lyngba ka MPSC bad DSC bad bthah ïa u nongujor ban leit shim ïa ka pisa na baroh ki briew kiba kwah kam katkum ka kyrdan pule jong ki. U nongujor u la ïohlum pisa haduh T. 80 lak na ki 38 ngut ki briew la shi snem kynthih bad siew pat ïa ka pisa sha u (ba kam kum IB Officer) hynrei u la leh kiar ïa u nongujor haba um shym la lah satia ban pynurlong ïa ka jingkular,” ong u kyrwoh ba la phah da u Superintendent of Police, (City) East Khasi Hills u Bah Vivek Syiem.
“Shuh shuh, sa kawei ka ejahar la ïoh pdiang ha Lumdiengjri PS ha ka 22 tarik mynta u bnai ha kaba ujuh u briew uba kam ïalade kum u Officer jong ka tnat Pulit Special Branch bad bthah ïa u nongujor ba u lah ban pynïohkam ha ka tnat Pulit da kaba buh kyndon ba ki nongaplai kin hap ban siew ïa ka pisa kaba T. 1 lak na ka bynta ki bym pat dep Matrik, bad T. 50 hajar na ka bynta kiba la pyndep ïa ka Matrik. U nongujor u la pyntip ïa kane sha ki paralok bad uwei na ki paralok u ladep siew boina ïa ka pisa T. 50,000 sha u briew lyngba u nongñiah kali ha Motphran, Shillong ha u bnai Lber 2023,” la ïathuh u SP (City).
Ha kaba ïadei bad kane, ïa mynta ki don ar tylli ki case ba la rejistar ha Mawlai PS C/No. 45(05)2023 hapoh ka Section 419/420 IPC r/w 66D IT Act bad ha Lumdiengjri PS C/No. 71(05)2023 hapoh ka Section 419/420 IPC.
“Ïa u briew uba donkti ban shu kam thok ïalade kum u IB Officer ba la ithuh kyrteng kum u Bah Richard Tiplang Swer (39 snem ka rta), la kem bad yn sa tian bishar ïa u ha kashari,” la ïathuh u SP.
Ki Pulit ki la ïoh kurup ruh ïa kawei ka kali Bolero kaba don ïa u nombar ML-05-Z-3007 bad ka siren, ka VIP blinker, ka mobile phone, ka laptop, ki kot ki sla na ingsah jong u na Wahingdoh.
U SP u la kyntu ruh ïa kino kino kiba la ngat ha ka jingshah shukor ha u Bah Swer ba kin wan shakhmat ban mudui da ka ejahar ha ki Police Station kiba don hajan.