Shillong, Jymmang, 25: Da ki spah ngut ki samla pule kiba angnud ban bteng ïa ka jingpule Bachelor of Education (B.Ed) ha PGT College, Shillong ki la mad ïa ka jingsuhsat hadien ba ki la hap ban leit ieng laiñ naduh dang saw tyngab tang ban ïoh ïa ka Form na kane ka College bad nalor kata la ïoh jingtip ruh ba ki don ki samla kiba la hap ban shu sah miet lypa tang ban ïoh ïa ka Form.
Katkum ka jingïathuh jong ki kmie ki kpa bad ki samla pule kiba ieng laiñ ban ïoh ïa ka Form na kane ka College ha ka jingïakren bad u nongthoh khubor, la ong ba ki bor pynïaid jong ka College ki la ai ïa ki Form tang 150 ha ka 24 tarik bad ha 25tarik bad sa 200 tylli ha ka 26 tarik u Jymmang, 2023, katba ki Seat ki don tang 33 tylli.
Ki la ïathuh ba la jan baroh ki samla na kylleng ka jylla ki la poi ban ieng laiñ tang ban ïoh ïa ka Form khnang ban ïoh bteng ïa ka jingpule B.Ed ha kane ka College.
Ha kaba ïadei bad kane, ka Khasi Students Union (KSU) ha u kyrwoh ba la phah sha ki lad pathai khubor ka la ong, “ka jingjia ha PGT College ha kaba ka jingieng laiñ ka jina naduh mynstep ka long kaei kaei ka bym sngewtynnad namarba ka Sorkar hi kam shim khia.”
“Ka KSU lyngba ka Education Cell naduh ki snem ba la leit ka la ïakynduh ïa ki nongpynïaid bad ïa ki nonghikai jong kane ka College ban ïasyllok ïa kane hynrei ka daw hi baroh ka dei ba ka Sorkar kam shimkhia,” la ong ka Seng.
Ka seng ka la pyntip ba kan sa leit jurip shibit ha ka por shiteng synñia namarba la ïoh jingtip ba kan don ka jingieng laiñ naduh 1 baje mynstep.
