Shillong, Jymmang 25 : Ka Khasi Hills Autonomous District Council (KHADC) hynne ka sngi ka la kyntu ïa baroh ki Rangbah Shnong ka sor Shillong ba kin peitngor ia ka rung ka mih ki briew kiba nabar ha ki shnong ki thaw khamtam hadien ka jingjïa ha Manipur.
Ïa kane ka rai la pynbna da u CEM ka Council, Bah Titos W Chyne hadien ka jingïalang bad ki Rangbah Shnong ha ka Conference Hall jong ka KHADC.
“Kane ka jingïalang ngi khot kyrpang tang ïa ki Rangbah Shnong ba don ha nongbah Shillong ban ïa kren halor ka jingïohi ha ki lad pathai khubor ïa ka jingsdang jong ka jingwan ki briew kiba nabar ban wan buhai shnong, wan riehtngen ha ka sor jongngi kumba phi ïohi ha Madanrting kaba ki paidbah na Manipur kiba la wan ban shnong ha Madanrting bad mynta lehse ki la krih sha kiwei ki shnong,” u la ong haba kren bad ki lad pathai khubor.
Shuh shuh u ong ruh ba ha katei ka jingkynduh ïa ki nongïalam shnong, baroh ki rangbah shnong ki la pynpaw ba ki la shimkhia bad don kiba dang thmu ban sdang bad don ruh kiba la dep sdang. “Kumjuh ruh ngi la kyntu ba kin long kiba peitngor ban tohkit bniah ïa ki briew kiba wan na shabar ym dei eh tang ïa kiba wan na Manipur hynrei ruh ïa kiba wan nabar jylla kiba wan ban shongwai kiba wan ban trei bad wan ban khaii ha kane ka nongbah. Ha kane ka sngi, da ka jingai jingmut lang jong baroh ngi la shim ïa ka rai ban rejistar ïa ki nongshong wai baroh kiba don ha ki shnong jong ki. Na kata ka daw, ngi la rai ban pynmih ïa ka notification na ka liang jongngi sha baroh ki Dorbar Shnong kaba ki ong ka Khasi Hills Autonomous District Maintenance of Household Register, kaba mut ka jingrejistar ki Dorbar Shnong ïa ki nongshong wai kiba don la ka long ki Khasi ne kiba wan na kiwei ruh ki jylla.”
U CEM u ïathuh ruh ba ki la shim ïa ka rai ba kino kino kiba mut ban wan shongwai ki hap ban ïoh shwa ïa ka jingbit na ki Dorbar Shnong, kaba mut ba ki trai iing ha shwa ba kin ai wai ïa ki iing jong ki, ki hap ban pyntip shwa sha ka Dorbar Shnong bad hadien ba ki la ïoh ïa ka jingbit kin sa lah ban ai wai ïa ki iing jong ki ym dei tang ïa ki iing shong wai hynrei wat ïa ki dukan ne khaii pateng ruh.
Ha kajuh ka por u la ïathuh ruh ba u Rangbah Shnong ka Madanrting u la pynshai ba ka jingwan jong ki briew kiba nabar ha katei ka shnong kadei khlem ka jingtip jong ka Dorbar Shnong hynrei lyngba kawei ka kynhun niam kaba ai jaka ba kin shong kin sah. U ong ruh ba ka shnong ka la shimkhia bad haduh mynta ki don sa tang kumba 32 tylli ki longiing kiba dang don ha katei ka jaka sah hynrei ïa kiwei pat ym lah ban ïoh jingtip.
“Da ki spah ngut ym tip shaei ki la poi kaba mut ba ki lah ban poi sha kiwei pat ki Dorbar Shnong. Na kata ka daw nga la khot ïa kane ka jingïalang ba ngin long kiba peitngor ba ngin long phikir bha ïa ka jingwan jong ki briew kiba nabar.”
