Nongpoh, Nailur 06: Ka Ministry of Education lyngba ka tnad Pule puthi ka Sorkar India ka la pynkup burorm ïa ki 75 ngut ki nonghikai na kylleng ka ri ba la shah jied ban ïoh pdiang ïa ka khusnam lane Best Teachers, ka long ruh ka burom ïa ka jylla Meghalaya ha kaba uwei u nonghikai na Ri Bhoi ruh u la ïoh pdiang lang ïa ka khusnam ha ka jingrakhe kyrpang ïa ka sngi burom jong ki nonghikai ba la pynlong ha New Delhi bad ba la pynkup burom ruh da ka president ka ri India, ka Droupadi Murmu.
U nonghikai na Ri Bhoi, uba la ïoh pdiang ïa ka National Award u dei u nonghikai Science jong ka Alpha English Higher Secondary School, Nongpoh bad ba la tip kyrteng kum u Madhav Singh.
Ka Sorkar India lyngba ka Ministry of Education ka la ai mynsiem ruh ïa kine ki Nonghikai ba la ïoh pdiang ïa ka khusnam da kaba aiti ïa ka synod, ka song pisa kaba T. 50,000 ryngkat ka takma.
Haba kren halor kane ka jingïoh pdiang ïa kane ka khusnam ha ka kyrdan Higher Education, u Madhav Singh, u la pynpaw ka jingkmen kaba khraw ïa ka tnad Pule Puthi na ka jylla bad na ka ri hi baroh kawei bad kane ka jingïoh pdiang ïa ka khusnam ka long shisha ka jingai mynsiem ïa u kum u nonghikai ba un dang lah shuh shuh ban ai ka jingshakri kaba paka ïa ki khynnah na ka bynta ban kyntiew ïa ki khun samla ha ka liang ka jingnang ka jingstad kiba dei katkum ka juk stad ba mynta.
U la ong ruh halor kane ka jingïoh pdiang ïa kane ka National Award, ka burom la leit sha baroh kito kiba la ai mynsiem bad kyrshan ïa u, kynthup naduh ki bor pynïaid ka skul, ka tnad Pule Puthi jong ka Sorkar Jylla bad ka Sokar India hi baroh kawei, ha kaba kum u nonghikai u la pynpaw ruh ba u dang don kata ka mynsiem ban ai ka jingshakri kaba paka sha ki khynnah skul khnang ba ka jylla bad ka ri kan dang kiew shaphang ka liang ka pule ka puthi ha kaba ha kane ka juk stad mynta khlem ka jingnang jingstad ka long ka lawei kaba dum ïa ki khun samla ka jylla bad ka ri hi baroh kawei.
