Kynrud, Nailur 06:Ka Party VPP kam shym la pynmih kyrtong ha ka elekshon MLA baladep wat lada bun ki paidbah ki la thrang ban ïoh Prah
Mynta ka sngi haba la pynlong ïa ka jingïalang ha Kynrud, ki paidbah ki la mih puk ban wan ai jingkyrshan bad pynïasoh bad ka Voice of the People Party(VPP).
Ïa kane ka jingïalang la pynlong da ka VPP Mawthadraishan bad la ïoh ïa ka jingkren na u Bah Ardent Miller Basaïawmoit, MLA Nongkrem bad President ka Seng bad kumjuh ruh na u Bah Brightstarwell Marbañiang, MLA jong ka Mawlai.
Ka jingkren na kine ki arngut ki MLA ka long beit ban khot ban wer ïa ki paidbah ban ïatreilang ban wanrah ka jingkylla sha ka jingsynshar kaba khuid ba suba, ka elekshon ne jingïajied Nongmihkhmat da ka lynti kaba khuid bad ba donakor ka bym dei ban da ap pisa shuwa ban jied Nongmihkhmat.
U Bah Ardent u la ong ba ka jingshah teh mraw ki paidbah ka jylla mynta kam dei ha ki briew kiba nabar, hynrei kadei ha ki Nongmihkhmat la jong, namar ba la ïashim pisa por elekshon. Mynta haba u briew ne ka briew ba jop ki la long ki Nongmihkhmat kim kheiñ briew shuh bad phim lah khih shuh, namar ki teh mraw da kaba byrngem ban nym ai skhim shuh, lada phet noh shawei.
“Kata kadei kaba jia ba long ha kine ki sngi mynta”, la ong u Bah Ardent.
Kumta u khot u wer ïa ki paidbah ban kyrshan noh ïa ka VPP na ka bynta ban long ki nongthep vote kiba laitluid bad bym shah teh hano hano ruh.
Hadien ka jingpynshai la ïoh ban pynrung dkhot ha kaba da ki spah ngut kiba dei ki Nongkyrshan ka HSPDP, UDP, NPP bad Congress na ki Shnong bapher bapher ka thaiñ Kynrud ki la wan ban pynïasoh sha ka VPP.
