Pynrem ka KSU ïa u Waheh Shnong Thangskai ba ai syrnot ïa u bar jylla ban pule Doktor

Khliehriat, Nailur, 6: Ka Khasi Student Union East Jaiñtia Hills District Unit, ka pynrem jur ïa ka jingleh u Waheh Shnong Thangskai, uba la ai syrnot ïa uwei u bar jylla ba u dei kum u nongshong shnong ba pura jong ka shnong Thangskai, East Jaiñtia Hills District bad lyngba kane utei u bar jylla u la ïohlad ruh ban leit pule doctor (MBBS) na ka bhah jong ka jylla Meghalaya, la ong ba ka seng hi kam lah ban pdiang ïa kane kaba long kum ka jingknieh noh ïa ka bhah jong ki trai jylla.
Haba kren sha ki pathai khubor, u President jong ka KSU East Jaiñtia Hills District, u bah Streamly.S.Suchen, u la ong ba “Kane ka jingïoh syrnot jong utei u bar jylla ka pynduh mynsiem bad pynduh jingkyrmen ïa ki samla jong ka jylla, ka jingleh jong kiba kum kine ki Rangbah shnong ka long kumba iuhroit bad pynbitar ïa ka jaitbynriew bad pynduh jingkyrmen ïa ki khynnah pule kiba don hok ban ïoh ïa ka bhah, kumta ngi pynrem jur ïa kane ka jing shah knieh noh ïa ka bhah jong ki trai ri trai muluk”
“Kaba pynlyngngoh shuh shuh ïa ka seng ka long ba kumno une u bar jylla u la ïoh ban leit pule na ka bhah jong ka jylla jong ngi bad kane ka dei na ka daw ba u ïoh ïa ka jingithuh kum u nongshong shnong ka thaiñ East Jaiñtia Hills District, ngim poi pyrkhat ba une u bar jylla uba dang wan poi tang ha kine ki khyndiat por hapoh ka jylla jong ngi u ïoh ïa ka syrnot kum u nongshong shnong jong ka Thangskai, ngi pynrem jur ïa ka Dorbar Shnong Thangskai kaba la ai syrnot ïa une u dkhar Bihari bad u kpa jong utei u khynnahu dei u Sunil Kunwar, u dei uba trei hapoh ka company Dalmia Cement kaba don ha Thangskai bad utei u khynnah u dei uba pule ha ka skul jong kaStar Cement bad pyndep ïa ka class 12 na Orissa bad utei u khynnah u la rung ha ka thup kyrteng (list) jong kiba ïoh ban pule doctor kaba dei na ka bhah jong ki nong Meghalaya”
U President jong ka KSU East Jaiñtia Hills District Unit, u la pynpaw ka jingnsgew bitar halor kane ka jingïoh bhah utei u khynnah bar jylla bad u pynrem jur ruh ïa ka Dorbar Shnong Thangskai kaba la ai syrnot, ha kajuh ka por u la kyntu bad maham ruh ïa baroh ki Dorbar Shnong kiba doh ha East Jaiñtia Hills District ba ki dei ban husiar bha ba kim dei ban shu ai syrnot pathar ïa ki bar jylla ki ba shu wan kamai bad wan kjit ïa ka spah ka phew na ka jylla ka jong ngi.
Ïa katei ka jingïoh syrnot utei u bar jylla, la lap da ki nongialam jong ka KSU Seng kmie, ha kaba ki la lap ruh ba ka don ka kyrteng jong ki bar jylla ruh kiba rung hapoh ka thup jong ki ban leit pule MBBS kaba dei hok ka bhah jong ki trai jylla bad lap ruh ba ïa ka syrnot ba la ai da u waheh shnong Thangskai ïa u tei u bar jylla ka dei naduh ka 23 tarik u bani nailar 2021.