Nongpoh, Risaw 20: Kumba 4 ngut ki briew kiba mynsaw bad uwei u rangbah u la khlad noh syndon hashen haka jingjia aksiden ha ki 2 tylli ki jaka mynta ka step ha Umling bad Shangbangla ha surok bah National Highway 6.
Katkum ka jingtip ba la ioh lum, la ïathuh ba mynta ka step haka por kumba 4:20 baje eiei kawei ka trok 407 kaba don ïa u number ML 05 P 3599 ba la ñiah da u Subruta Das na Beltola Assam kaba dang kiew na Guwahati sha Shillong hynrei ynda poi ha Shangbangla u nongñiah katei ka trok u la tynrah beit ïa ka jingker napdeng surok (Divider), haduh ba kan da kylla bad ha katei ka jingjia uwei u rangbah ba la tip kyrteng kum u Abijit Barbara na Laban u ba shonglang ha katei ka trok u la khlad noh syndon hashen bad 2 ngut ki la mynsaw malu mala bad la pynkit noh mar mar sha Civil Hopspital Nongpoh.
Sa kawei pat ka jingjia aksiden ka la jia ha Umling haka por kumba 8:30 eiei mynstep ha kaba kawei ka trok thylli kaba don ïa u number AS 25FC 8376 ka la jam na shilliang sha shilliang surok bad leit tynrah beit ïa kawei ka kali kit ñiut jong ka shnong Pahamlapong bad Pahamsohthri kaba don ïa u number ML 10 C 5589 ba ha katei ka jingjia u nongñiah jong katei ka trok kit ñiut ba la tip kyrteng kum u Arjun Chetri na Pahamlapong Nongpoh, ula mynsaw jur bad uwei pat u paralok ba shong lang u la mynsaw malu mala bad la pynkit noh mar mar sha Civil Hospital Nongpoh naka bynta ka jingsumar bad namar ka jingshitom kaba jur la pynkynriah noh sha Bethany Hospital Nongpoh ban ioh ka jingsumar ba kham bha, katba u nongñiah katei ka trok u la phet krad na katei ka jaka.
Na ka liang ki pulit ka Nongpoh PS ki hiar mar mar sha katei ka jaka bad ka jingtohkit halor katei ka jingjia ka dang ïaid shakhmat.
