Khang tala ka FKJGP ïa ka mashin tylliat maw jong ka kompeni shna surok Nongstoiñ-Wahkaji

Nongstoiñ, Risaw 20: Namar ka jingbun jong ki bar jylla kiba wan trei bad ka Kompeni kaba shna ïa ka surok Nongstoiñ Wahkaji, ki nongïalam ka FKJGP West Khasi Hills District unit, ha ka sngi thohdieng ki la hiar sha ka jaka sah jong ki nongtrei jong katei ka Kompeni kaba dei ruh ka jaka ba ki mashin tylliat maw lem bad kiwei kiwei ki mashin kiba dei ban trei ïa katei ka surok ki don.
Ha shuwa ban leit ha katei ka jaka ba ki nongtrei bar jylla ki sah, ki la leit ban ïakynduh ïa ki heh nongpynïaid jong katei ka Kompeni kaba don ha jan jong katei ka jaka, ban kylli la ki la pynbiang ne em ïa ki kot ki sla kum ki labour licence bad kiwei kiwei sha ki nongbylla ba ki wanrah na kiwei pat ki jylla.
Ha katei ka jingleit tohkit na kitei ki heh nongpynïaid, la lap ba la jan baroh ki nongtrei ki la don ïa ki labour licence lait noh tang kumba katto katne ngut. Nalor kata la lap ruh ba dei tang ki nongtrei kiba pynïaid ïa mashin tylliat maw, ki bym don ïa ki labour licence bad ki nongïalam ka seng ki la khang tala shuwa ïa katei ka mashin tylliat maw bad ki la bthah ïa ki nongpynïaid jong katei ka Kompeni, ba kin pynbiang noh kloi katba lah ïa ki labour licence jong kitei ki nogntrei mashin.
U bah Carry Oscar Kharmuti vice president ka FKJGP West Khasi Hills, haba kren ha ki lad pathai khubor u la ong ba ka jingwan khynra labour licence jong ka seng ïa ki bar jylla ha katei ka jaka, kam dei namar ba ki kwah ban pynthut ne ban khang ïa ka jingshna ïa katei ka surok, hynrei ka dei namar ba ka seng ka kwah ba ki bar jylla haba ki wan rung ha poh ka jylla Meghalaya, la ki dei ki nongkhaïi nongpateng bad ki nongdie jingdie bad ki nongbylla ruh, kim dei ban shu wan rung lait lan kum ki masi ki blang, hynrei ki dei ban wan da ka lynti da kaba burom ïa ki aiñ bad ki kyndon ba la buh da ka sorkar.
Haba kylli pat ha kaba ïadei bad ka jingdon jong ki khyrdop talasi ïa ki kot ki sla jong ki bar jylla ha ki khappud, kiba ka sorkar ka la buh na ka bynta ban peitngor ïa ka jingwan rung kyrthep ki bar jylla, utei u nongïalam ka seng u la ong ba ka dei kaba shisha ba ka sorkar ka la buh ïa ki khyrdop ha ki khappud ban talasi ïa ka jingwan rung kyrthep jong kiwei pat ki jaitbynriew, hynrei wat la ki don ruh kin ym lah ban lap lut ïa baroh ikiba wan rung ha ka jylla. Kumta na ka liang ka seng ka hap ban shim ka jingkitkhlieh ban peit ïa kane ka bynta.
U la kyntu jur ruh ïa ka sorkar ba ka dei ban kham pyrkhing shuh shuh ha ka ban phah talasi ïa ka jingwan rung kyrthep jong kiba nabar shapoh ka jylla, namar lada ki nongap ha ki khyrdop talasi ïa ki briew ba nabar kiba wan rung hapoh ka jylla kim shimkhia, ka seng ryngkat ki rangbah shnong, ki seng samla shnong kan ym ailad ba ki ba nabar jylla kin shu wan rung kyrthep khlem ka lynti kaba dei.
U la ong ba ha ka jingshisha ka sorkar ka la dei ban peit bha ba ki Kompeni kiba wan trei ïa ki surok bad kiwei kiwei ki kam hapoh ka jylla, ki wan ïa baroh ki kam ba ki trai jylla ki lah ban trei ka Kompeni, ka dei ban thep da kiba napoh ka jylla, khamtam eh ïa ki trai shnong bad ki trai muluk, namar ha kitei ki Kompeni ki baroh ki samla bad ki nognshong shnong napoh ka jylla ki la nang lut ban trei lait noh tang katto katne eh ki kam ba kim lah.