Na Mendipathar lap u Myntri ba wanrah jingkyrkhu ka lynti rel ïa ki nongshong shnong
Da ka kali 280 da ka rel tang 30tyngka
Shillong, Risaw 20 : U Myntri ka tnad Food & Civil Supplie ka sorkar jylla, Bah Comingone Ymbon ha ka sngi Thohdieng u la pynpaw ba u pdiang sngewbha ïa ka jingwan ka lynti rel ha East Jaintia Hills namar u la ïohi hi dalade katno ka wanrah jingmyntoi.
“Dang shen nga leit sha rilum Garo ban pynher lama ha ka Independence Day bad hadien ba la dep kam nga leit sha railway station ha Mendipathar bad nga ïohi ki paidbah na katei ka thain ki ïoh myntoi bha namar lada leit da ka kali ki hap ban siew 280tyngka marwei hynrei da ka rel tang 30 tyngka na Mendipathar sha Guwahati,” u la ong haba kren bad ki lad pathai khubor.
Shuh shuh u ïathuh ruh ba ki paidbh ki mih 7baje mynstep na Mendipathar bad kin wanphai biang pat 7baje janmiet. “Ki nongrep ki ar shang u soh lane kino kino ki mar rep nangtei bad ki leit ban die sha Guwahati bad ki ïoh nong ruh kham bun. Wat ki marbam ruh nga kylli na kawei ka dukan hangtei ba ka dor u khaw ha Resubelpara ka long 31tyngka shi kilo hynrei ha Shillong pat ka poi 44 tyngka, haduh katta ka jingïapher,” u la bynrap biang.
Utei u Myntri u la ong ruh ba lada ka rel ka wan, ki paidbah ha rilum Jaintia kin ïohnong kham bun. “Ngi don bun ki marpoh khyndew kum u mawshun, dewiong kiba la ju khaii da ki trok bad ka bai kit ka poi kumba 2,000 tyngka shi ton hynrei lada ngi phah kit da ka rel ki lah ban poi tang 500 tyngka shi ton bad 1500 tyngka ka la neh ha pla jongphi.”
Da kaba kyntait pat halor ka jignpyrshah jong ki sengbhalang halor ki lynti rel, u Myntri u la ong ba katei ka lah ban mih na ka jingtieng ïa ka jingrung kyrthlep ki mynder. Hynrei u ong pat ba ka sorkar jylla ka la dep ban mynjur ïa ka Official Resolution ban kyntu ïa ka sorkar ba kadei ban pyntreikam noh ïa ka Inner Line Permit ha ka jylla.
“Mynta ka bor ka don ha ka sorkar pdeng, kumta ngin ap shwa ïa ka sorkar pdeng ban mynjur ïa ka,” u la ong.
Dang shen ka sorkar jylla ka la rai ban wad ïa ki lad ki lynti kumno ban wanrah noh ïa ka lynti rel ha ki bynta jong ka East Jaintia Hills District hynrei kane ka la wanrah ïa ka jingpyrshah kaba jur na ki kynhun bapher bapher na katei ka thaiñ.