Shillong, Risaw 20: Ha ka 18 tarik mynta u bnai, ki ktem jong ka NPP ha Pynursla Constituency kaba long ka strong hold jong ka NPP, ki la synjor kynsan kynsan haba da ki hajar ngut ki paidbah ki la wan pynïasoh sha ka Seng VPP.
Kane ka jingwan pynïasoh ka long ha ka jingïalang kaba la pynlong daka VPP ha Urksew,kaba ha ka jingjied MLA ka hap sha Pynursla Contsituency, katba ha ka elekshon MDC pat ka hap sha Nongshken Constituency.
Ha kane ka jingïalang la don lang u Bah Ardent Basaïawmoit, President jong ka Party bad MLA jong ka Nongkrem, u Bah Adelbert Nongrum, MLA ka North Shillong, Bah Brighstarwell Marbañiang, MLA ka Mawlai ryngkat bad kiwei kiwei pat ki nongïalam jong ka Party.
Ki paidbah kiba la wan sha kane ka jingïalang kaba shongshit bha, kaba ym tang ba la ïoh jingpynshai na ki nongïalam ka VPP, hynrei la ïoh ruh ïa ki jingrwai jong kane ka thaiñ. Ki paidbah kiba la wan ki kynthup ruh ïa kiba dei na ki thaiñ ki shnong khappud bad ka Bangladesh, kata kiba hap ha ka Nongshken Constituency ha ka elekshon MDC.
Hadien kane ka jingïalang ka VPP, ka la pynlong sa ïa ka jingïalang ha ka por janmiet sa ha Laitlyngkot, kaba hap ha ka Sohra Constituency. Ki paidbah ki la wan na ki shnong jong ka Elaka Laitlyngkot, Raid Nongkynrih bad kiwei kiwei ki shnong kiba hap ha Sohra Constituency. Kane ka jingïalang ka la bteng haduh ka por mynmiet ruh bad wat hapdeng ka jingbeh ka lyer khriat, pynban da ki hajar ngut ki paidbah ki la wan ban sngap ka jingpynshai ki nongïalam ka Party kaba la pynlong ha madan.
Lah ban kdew hangne ba ka Pynursla Constituency kadei ka ktem ba khlaiñ jong ka NPP ba la mihkhmat da u National Vice President ka NPP bad u Symbud Myntri Rangbah, u Bah Prestone Tynsong. Katba ka Sohra pat kadei kaba la mih khmat da u Bah Gavin Mylliem, uba la jop na ka Seng PDF bad rung sha ka NPP hadien ka elekshon MMLA mynta ka snem.
