Shillong, Risaw 20: U Myntri Rangbah ka jylla, u Conrad Sangma, dang shen u la pyllait paidbah ïa ka skhim kaba la ai kyrteng CM Elevate, kaba dei ka skhim kaba ai ryngkat bad ka Subsidy na ka skhim jingïarap pisa lang na ka sorkar bad kaba sei hi nalade ban leh ïa kino ki kam ban ïeng ha la ki jong ki kjat. Ka subsidy ka long haduh 75%.
Kane ka skhim ka long ban treimam ha kiba bun ki bynta jong ka jingtreikam, naduh ki kam tourism, kam seng karkhana, ri jing ri, seng dukan bad kiwei kiwei de.
Hynrei kiba bun ki la pynpaw ruh ka jingsngew artatien, la kane ka skhim kan treikam bha ne em, ne kiba aplai ban ïoh ïa kane ka skhim kin ïoh ne em katkum ka jingkwah bad ka jingangnud jong ki.
Kiba bun ki paidbah kiba la ïoh ban ïakren ki la pynpaw ïa ka daw balei ba ki artatien ïa kane ka skhim. Ka daw kaba ki la ai kadei da kaba ai nuksa ïa ka skhim FOCUS bad FOCUS + ne ka FOCUS PLUS.
Ka Skhim FOCUS kadei ka skim kaba la pynmih da ka sorkar jylla ha ka snem 2021 ha kaba la mang ban ai sha ki nongrep lyngba kita ki Producer’s Group kiba dei ki kynhun ba la thaw da ki nongrep. Ka jingmang ka sorkar ka long ban ai jingïarap mar san hajar tyngka iwei iwei i dkhot jong ki Producer’s Group. Ha ka snem 2022 shi snem shuwa ka elekshon MLA, u Myntri Rangbah u la pynbna sa ïa ka FOCUS +, kaba long ka jingbteng ïa ka FOCUS.
Hynrei kiba bun ki dkhot jong kine ki Group ki la ïathuh ba ki la seng ïa ki Group jong ki naduh u 2021 bad la pynbiang lut ïa ki jingdonkam,pynban kim shym la ïoh satia ïa kata ka san hajar tyngka wat haduh mynta.
“Ngi la thaw ïa ki Group bad pynbiang lut ïa ki kot ki sla nadong shadong, hynrei ngim shym la ïoh ïata ka skhim”, la ong kiba bun ki dkhot jong kine ki Group.
Ym tang ka skhim Producer’s Group, kiba bun ruh ki la pynpaw ba wat ka YESS Scheme ruh kaba la ai da ka tnad Sports and Youth Affairs, kiba bun kiba la aplai hynrei kim shym la ïoh satia. Kane ka skhim kadei kaba la mang haduh 1 lak tyngka na ka bynta ki Sports Club, ki Youth Club ba kin pynlong ki prokram bapher bapher kiba ïadei bad ki Samla. Pynban kiba bun kiba aplai ki la ïathuh ba kim shym la ïoh satia.
Dei namar kane ka daw ba kiba bun mynta ki la pynpaw ka jingartatien ïa kane ka skhim CM Elevate ruh, khamtam haba la pynbna ne pyntreikam satang khyndiat bnai shuwa ban long ka elekshon, la ka long ka elekshon jied MDC ne ka elekshon jied MP sha Lok Sabha.
“Ngi kyrmen ba kane ka skhim kan nym dei tang ka skhim pynbieit elekshon kum ka FOCUS”, la ong katto katne ki samla kiba thrang ban ïa kane ka skhim na ka bynta ban ïeng ha la ki jong ki kjat.
