Shillong, Risaw 20 : U nongïalam ka NPP ha ka jylla ba dei ruh u Myntri sorkar ka jylla, Bah Comingone Ymbon ha ka sngi Thohdieng u la ong ba ka Voice of the People’s Party kan ïoh ‘nod’ ha ka elekshon MDC kaban sa long shen na Khasi Hills Autonomous District Council kumjuh ruh na Jaintia Hills Autonomous District Council.
“Nga la ïohi lpa ba ka VPP kan sa ïoh ‘nod’ namar mynta ki paidbah kim pdiang ïa ka VPP ha Khasi bad kumjuh ha rilum Jaintia,” ong u Bah Coming haba kren bad ki lad pathai khubor.
Shuh shuh u ong ruh ba ka daw hi ka long ba ki paidbah ki tip kham bha ïa kane. “Nga la ïohi ïa kane ha ki lad pathai khubor ba phi long pyrshah ïa ka VPP bad ki paidbah ruh ki long pyrshah ïa ka,” u la bynrap biang.
U Bah Coming u la pynpaw ruh ïa ka jingsngewskhem ba ka NPP kan sa wan biang ha ka bor ha rilum Khasi bad Jaintia hadien ka elekshon MDC kaba la buh ban long ha u snem ban wan. Katkum ka jingong jong u, ka NPP mynta ka ïakhun ym tang ïa ka VPP hynrei ïa ka UDP, Congress, BJP ruh ha ka por elekshon.
“Hynrei kumba long mynta, nga ïohi ïa ki paidbah ki la dep ban ai ka jingkyrshan ïa ka NPP kaba ïalam mynta ïa ka sorkar bad kumta nga ngeit ba ka NPP kan wan biang ha ka bor wat ha ka elekshon MDC ruh kumjuh,” u la bynrap biang.
