Hukum u CM ïa ki ophisar ban pynshitom ïa ki nongtrei kiba dih kiad ha ki kynta trei ophis

Mawkyrwat, K’lyngkot, 24: U Myntri Rangbah ka Jylla Conrad K Sangma u la ai hukum ïa ki ophisar ba ki dei ban pynshitom da kaba tyngeh lada lap ïa kino kino ki shakri Sorkar ba ki dih kiad ha ki kynta ba dang dei ka por treikam ha ophis.
Ka jingai hukum jong u Myntri Rangbah ka la jia ha ka jingïamir jingmut bad ki paitbah jong ka thaiñ Ranikor ha ka Block Level Community Interaction Programme lyngba ka CM Connect Programme hadien kaba kawei ka longkmie ka la phla hakhmat u Myntri Rangbah ba ki nongtrei Sorkar kiba la khot ban leit beh ïa ki Hati khlaw kiba pynjot ïa ki ïing ki sem bad ïa ki mar rep ha ka thaiñ Ranikor ki la wan hapdeng ka jingbuaid kiad kat haduh ba kim nang shuh ban trei ïa ka kam.
Da ka jingbitar, u Myntri Rangbah u la khot shakhmat ïa u Range Officer jong ka Nongstoin ban tohkit markhmat na u bad ha kajuh ka por u la ai hukum ruh ba u dei ban pynshitom ïa ki nongtrei kiba buaid kiad katba ki dang don ha ka kamram.
“Hato phi phah da ki briew kiba buaid?” la tohkit u Myntri Rangbah na u Range Officer. “Phi dei ban pynthikna ban pynshitom ïa kita ki nongtrei bad lada nga ïoh jingtip kum ïa kita ngan pynshitom da kaba tyngeh namarba ngim lah ban pdiang da leilei ruh em ba kin buaid kiad ha ka por treikam,” la maham u Myntri Rangbah.
Ha kane ka jingïalang kaba la long ha madan Pamdaba, Ranikor Civil Sub Division, South West Khasi Hills District la ïadonlang ka Myntri Sorkar ka Dr. Ampareen Lyngdoh, u MLA ka Mawkyrwat Bah Renikton Tongkhar, u MLA ka Ranikor Bah Pius Marweiñ, u Principal Secretary ka tnat C&RD u Sampath Kumar, u Deputy Commisisoner ka South West Khasi Hills u Bah B. Mawlong, u Superintendent of Police u Bah B. Jyrwa, u Additional Deputy Commissioner Bah L. Kynjing, ki Block Development Officer jong ka Mawkyrwat C&RD Block u Bah I. Lawryniang bad ka Ranikor C&RD Block Bah S. Marweiñ bad kiwei kiwei.
Haba kren ha ka jingïalang, u Myntri Rangbah u la pynsngew ba kane ka jingïakynduh lang kam don jingïadei eiei ruh em bad ka saiñpyrthei hynrei ka dei kawei na ki jingïalang ba kyrpang ban ïoh ïaphylliew jingmut bad ba ka Sorkar kan tip ïa kaei ba ki paidbah ki ïakynduh jingeh bad kiei ki jingdonkam ba ki donkam hapoh ka thaiñ.
U Sangma ula ïohlad ruh ban kylli bad ïakren markhmat bad ki paidbah bad ha kajuh ka por ban pyntreikam mardor ïa ki kam kiba long ka jingmyntoi jong ki paidbah ha ki thaiñ Ranikor kata ha kaba ïadei bad u Transformer ha ka shnong Nonghyllam u bym treikam shuh mynta la shi snem eiei bad la bthah ba dei ban pyntreikam noh ha kane ka taïew, ban pynbha ïa ka jaka jngohkai pyrthei hapoh Nongnah ha kaba ïa kane na ka tnat Tourism ladep mang pisa T. 32 klur na ka bynta ban shna ïa ka Resort bad kumjuh ka jingpynbha ïa ka jaka jngohkai pyrthei ka ban kot T. 6 ne T. 7 lak.
Kawei pat ka jingïakren ka long halor ka jingpynbiang ïa ka umbam umdih ha ka thaiñ Khonjoy bad ïa kane ka ophis PHE kan sa pyntreikam noh da kaba thmu ban pyndep hapoh u Lber, 2025.
Ha kaba ïa dei bad ka jingkyntiew ïa ka pule puthi kaba ïadei bad ki skul shimet kata ïa ka School NMRC ha shnong Keniong, u Sangma markhmat hi ul a pan beit da ka jingthoh ba ïa kane ka kam un sa mang pisa kyrpang na ka Chief Minister Development Scheme. Halor ka jingkwah jong ka shnong Pormawdar ban don noh ïa ka jaka treikam jong ka Veterinary bad ïa kane da ka jingmynjur ba ka shnong kan ai ïa ka jaka ban shna kumta markhmat ha ka jingïalang ki la rai ban pyntreikam ïa kaei ba ka shnong ka kwah.
Halor ka jingpynjulor jong ki Hati Khlaw ïa ki iing ki sem bad ki jingthung jingtep u Sangma u la kyntu ïa ka tnat Wild Life ba ka dei ban shimkhia bad ym ban kheiñ sting khamtam ïa ki mynsiem briew.
La pynshai ruh ba Sorkar India mynta kam shah shuh ban ym don ïa ka Aadhaar Card namarba baroh ki kam pynroi ki wan beit lyngba ka jingdon ïa ka Aadhaar Card.
Ha kaba ïadei bad ka surok kaba ïaid na Weiloi – Mawkyrwat – Ranikor ïa kane la don jingthmu ban pyntreikam noh. Ïa ka surok na Phlangdiloiñ – Ranikor u Myntri Rangbah u la kular ba un sa shim jingkitkhlieh bad kiwei de ki kam kiba dei ka jingmyntoi jong ki paidbah.
Ha kane ka juh hi ka sngi la sam ïa ka song pisa da ka Cheque kaba kot T. 12 lak tam sha ki ar tylli ki Village Organization kata, ka Mahila Village Organization na shnong Sudorgora bad ka Mangragalani Village Organization na shnong Upper Rajapara.