Wan katba ka jingkhang ka dang plie ïoh poi ka por ba ka jingkhang ka khang noh kyntu u Dy.CM ïa ka HNLC
Ka tnad pulit kam ju pyndonkam da kiba wan pyndem

Shillongm Kyllalyngkot 24 : Da kaba kyntu ïa ka seng Hynniewtrep National Liberation Council (HNLC) ban wan sha ka miej jingkren ïasuk katba ka jingkhang ka dang plie, u Symbud Myntri Rangbah u la ong ruh bishar bniah bad wan ban bteng ïa ka jingkren ïasuk namar ïoh poi ka por ba ka jingkhang ka khang noh.
Haba jubab halor ka jingkylli ba ka seng HNLC haduh mynta kam jubab hynrei ka sngap beit jar halor ka jingtyrwa bad kyntu ka sorkar, u bah Prestone u la ong “ Lada kim salia ïa ka jingkyrpad jong ngi, nga kwah ban pynkynmaw ba kane ka dei ruh ka jingkhot bad kyntu na ka sorkar pdeng ym tang ka sorkar jylla, kumta ka por ka dang don mynta ban wan sha ka miej jingkren ïasuk ïoh ka poi ka por ba ka jingkhang kan khang kumta kan buh ïa ka seng ha ka jingeh pat ha katei ka por”.
La don mynta shisnem tam ba ka seng HNLC ka la weng noh na ka miej jingkren ïasuk bad ka sorkar pdeng bad ka sorkar jylla namar ka seng ka la weng ha u bnai Kyllalyngkot jong u snem ba la dep hadien ba ki bor sorkar kim lah ban ai ïa ki san tylli ki mat jingdawa jongka HNLC kaba kynthup ruh ban map ïa baroh ki jingshah pynngat kyndon jongki dkhot ka seng.
Halor ka jingkynnoh jongka seng HNLC ba ki pulit ki pyndonkam da ki dkhot ba pyndem wait jongka seng ban ïaleh pyrshah ïa ka seng, u Symbud Myntri Rangbah u la ong ba kane ka long ka bym don nongrim hangno hangno ruh. “ Namar ngi don ki bor pulit kiba la dep pyntbit ban trei 24 x 7 na ka bynta ban pynneh ïa ka jingshong suk shongsaiñ jong ki paid nongshong shnong ha ka jylla bad wat kito kiba wan seng kam seng jam bad wan jngoh kai sha ka jylla ruh”.
Halor ka manifesto ba la pyllait paidbah da ka seng HNLC dang shen u Symbud Myntri Rangbah u la ong “ Ngam treh ban ai kano kano ka jingkynthoh ai ba ki paidbah hi kin bishar namar ka sorkar ka don ka jingkitkhlieh ban peit tang ïa ka jingshong shngaiñ ki paid nongshong shnong hapoh ka jylla”.