Khlad hashen ka meiïeid ba 60 snem naba shah tynrah ha ka 2 sha ka ha Umlyngkdait

Nongpoh, K’Lyngkot, 24: Kawei ka mei ïeid kaba la 60 snem ka rta ka la khlad noh hashen hadien ba ka ka la shah tynrah ha ka thuk thuk ar sha ka katba ka dang jam na shilliang sha shilliang surok ha ka shnong Umlyngkdait ha Ri-Bhoi District.
Katkum ka khubor ba la ïoh lum naki pulit la ïathuh ba katei ka jingjia ka la jia ha ka por 5:45 eiei janmiet ha kaba katei ka mei ieid kaba la tip kyrteng kum ka kong Phensibon Kharshandi naka shnong Umryngksai ka dang jam na shilliang sha shilliang surok hynrei kynsan namar ka jingsted kawei ka thuk thuk ar sha ka kaba don ïa number AS 01 BU 0740 ba la ñiah da u Rajib Thakhuria na Henrabari jong ka jylla Assam, ka la tynrah beit ïa katei ka mei ïeid kaba dang ïaid lynti.
Ki Pulit ka Nongpoh Traffic Police tang hadien ka jingïoh jingtip ïa katei ka jingjia kil hiar maar mar sha katei ka jaka bad pynkit ïa katei ka mei ïeid sha Nongpoh Civil Hospital hynrei namar ka jingshitom kaba la kham jur katei ka longkmie ka la khlad noh ha katei ka jaka sumar.
Ki Pulit ki la kurup noh ïa katei ka thuk thuk bad leh katkum ki kyndon jong ka aiñ bad ïa utei u nongñiah katei ka thuk thuk la ïalam noh sha Nongpoh Civil Hospital ban pyndep ïa ka Medical Examination bad ka jingtohkit halor katei ka jingjia ka dang ïaid shakhmat.