Tang 5 lak tyngka la shah ban pynlut uwei u kyrtong Shaniah ka DCA ha ki DC ban bishar la donkam phah pyrton bor pahara ha ka election MDC

Shillong,Kyllalyngkot 24 : U Symbud Myntri Rangbah ka jylla uba dei peit ïa ka tnad District Council Affairs (DCA) bad Kam Pohïing (Home-Police) u bah Prestone Tynsong u la ïathuh ba ka sorkar lyngba ka DCA ka shaniah ha ki Deputy Commissioner (DC)jongki District ba kin bishar bniah la donkam ne em ban phah pynkhlaiñ pyrton shipai ha ki District jongki na ka bynta ka election MDC sha KHADC bad JHADC khnang ba ka election kan long kaba ïaid beit ïaid ryntih khlem kino kino ki jingpynthut.
“ Ngi la shaniah beit ha ki DC jong ki District bapher bapher ba kin bishar bniah la ki donkam pyrton bor pahara shuh shuh ha ki district jongki na ka bynta ban pynïaid beit ïaid ryntih ka Election MDC namar lada ki donkam ruh ki bor pahara ki la don lypa kiba la pynkhreh” ong u Symbud Myntri Rangbah.
U Symbud Myntri Rangbah ul a ïathuh ruh ba ka Model Code of Conduct (MCC) kan treikam naduh ka 27 tarik Kyllalyngkot ha baroh ki pud ki sam jong ki ar tylli ki Autonomous District Council.
U la ïathuh ka tarik ba khatduh ban pynmih ïa ka Electoral Roll kan long ha ka 27 tarik, ka tarik ban thep kyrteng ki kyrtong kan long naduh 28 tarik haduh 3 tarik Rymphang, ka jingbishar ïa ki kot ki sla kan long ha ka 3 tarik hi hadien ka 3 baje bad ka tarik ba khatduh ban weng kyrteng kan long ha ka 4 tarik Rymphang 2025.
Ka tarik ban pynmih ïa ki kyrteng jong ki kyrtong bad ban ai ruh ïa ki symbol jong ki kan long ha ka 6 tarik Rymphang. Ka tarik ban thep vote kan long ha ka 21 tarik bad ka tarik ban ñiew vote kan long 24 tarik.
U la ïathuh ruh ba la shah ïa ki kyrtong ban pynlut tang 5 lak tyngka marwei. Halor ka jinglut jingsep na ka bynta ban pynlong ïa ka election u la ïathuh ba ïa mynta ym pat lah ban ong namar dei tang hadien ka election kata hadien ba ki DC ki la ai ïa ki jingkheiñ jingdiah yn sa lah ban tip bad ïathuh.