Mynjur ki paidbah ka Musiang Lamare (Old) ban tih mawshun ar jaka ka Goldstone Cements Lt.d

“Ngi jied ia ka roi ka par,” pynpaw ki paidbah ha ka plakad

0

Khliehriat, K’lyngkot, 24: Ki paidbah jong ka shnong Musiang Lamare (Old), East Jaiñtia Hills District ki la ai kyrshan bad ai jingmynjur ïa ka Goldstone Cements Limited ban tih mawshun ha ka dong Umsangat kaba heh 18.19 hectare kaba don ha ka shnong Musiang Lamare (Old)
Kane ka jingai jingmynjur jong ki paidbah ka Musiang Lamare (Old) ka long da ka jingkyrshan ïa ka jingpynsngew paidbah (public hearing) kaba ar sngi kaba la pynlong da ka Meghalaya State Pollution Control Board (MSPCB) ha ka 23 tarik bad ha 24 tarik mynta u bnai.
Ïa ka jingpynsngew paidbah kaba la long hi ha ka dong Umsangat la pynïaid da u Additional Deputy Commissioner (ADC) ka East Jaiñtia Hills District u Bah G.Warjri ryngkat ka jingdonlang jong u Environmental Engineer ka MSPCB u Bah Y.F.Laloo.
Ka jingpynsngew paidbah kaba la long hynnin ka sngi Palei ka dei halor ka jingthmu jong ka Goldstone Cements Limited ban khlong ïa u mawshun na kawei ka par kaba ka heh 18.19 hectare kaba don ha ka dong Umsangat ha Musiang Lamare (Old).
Ha kane ka sngi, ki don phra ngut kiba la ai jingkren ha rynsan kiba kynthup ïa u Waheh Shnong ka Musiang Lamare (Old) u Bah S.Muksor, u dkhot ka Elaka Rymbai u Bah Nicholas Rymbai, u Acting Dolloi barim ka Elaka Rymbai u Bah L.Swer, u Bah Lumlang Muksor na ka shong Musiang Lamare (Old), u Bah Langshwa Kyndoh na ka shnong Lumshnong, u Bah Jes Siej na ka shnong Musiang Lamare (Old) bad u Bah Francis Pohshna na ka shnong Umlong. Kine baroh ki la ai ka jingkyrshan ïa ka Goldstone Cement Limited. Ha kane ka jingpynsngew paidbah ym shym la don mano mano ne kano kano ka kynhun kaba pyrshah.
“Naduh mynshwa ka Goldstone Cements Limited ka la pan ïa ka No Objection Certificate bad kum ka shnong ngi la shong pyrkhat sani bha halor kane bad la jan don haduh 70 percent ki paidbah jong ka shong kiba la ïohkam hapoh kane ka kompeni. Lada ka kompeni kam ïoh ïa ka par mawshun kan shem jingeh ban pynïaid ïa ki kam jong ka. Kumta hadien ba ngi la pyrkhat bha ngi la ai ïa ka NoC,” ong u Waheh Shnong jong ka Musiang Lamare (Old) u Bah Shadkmen Muksor.
Ha ka jingpynsngew paidbah kaba la long ha ka sngi Thohdieng, ka long hi halor kajuh ka jingthmu jong ka Goldstone Cements Limited ban tih ïa u mawshun na kawei pat ka par kaba heh 9.16 hectare ban pynmih haduh 10,00798 ton u mawshun ha ka shi snem na ka dong Umsangat kaba la tip ruh kum ka Limestone Deposit II.
Ki la arphew wei ngut kiba la ai jingkren bad napdeng kiba la ai jingkren ki la don tang ar ngut kiba pyrshah ïa kane ka projek tih mawshun bad kiba pyrshah ki long ka Kong Rinaroi Bareh bad u Bah Marbiang Bareh ka shong Umlong.
U Bah Soomeyoo Sayoo, uba dei u dkhot jong ka East Jaiñtia Truck Owner Association (EJTWO) u la ai ka jingkyrshan
da kaba ong, “ lyngba ka jingstad bad ka jingailad jong ki shnong ïa ka Goldstone Cements Limited ban pynheh ïa ka jingpynmih ïa u mawshun kan ai jingmyntoi ym tang ïa ka kompeni hynrei wat ïa ngi ruh kumjuh. Lyngba ka jingdon jong ki karkhana dewbilat ka wanrah jingmyntoi ruh ïa ki paidbah nongshong shnong.”
U Bah Sayoo u la kyntu ruh ba ka lada ka Goldstone Cements Ltd. ka kiew ha ka jingpynmih dewbilat kan ïarap ïa ki paidbah lyngba ka Corporate Social Responsitbility (CSR).
Ka Kong Rinaroi Bareh kaba pyrshah ban tih mawshun na ka par kaba 9.16 hacter ka long namarba ka Limestone Deposit II ka don hajan ka shnong Umlong bad hajan ka wah Riang.
“Lada ngim ïoh ïa ka mariang kaba bha, ka um bad ka lyer kaba khuid kam myntoi eiei ban ïoh ïa kata ka roi ka par haba ki jingpang jingshitom ki ïaid ryngkat. Ka koit ka khiah ngim ïoh. Lada tih ïa u mawshun ka buh jingma ïa ka umbam umdih. Lada kane ka projek ka treikam nangno ngin ïoh um ban dih, hato ka kompeni ka lah ban pynbiang umdih, namar shisien ba la duh ïa kaei kaba u Blei u la buh ngi laduh, ngam kwah kata ka jingïateh kular hynrei nga kwah ïa ka mariang kaba khuid,” la pynpaw ka Kong Bareh.
U Bah Paswel Patwat na ka shnong Umlong uba la ai ka jingkyrshan ïa ka Goldstone u la ong “da ka jingïamynjur lang jong ki nongshong shnong jong ki lai shnong, ka shnong Musiang Lamare (Old), ka Musiang Lamare bad ka shnong Umrasiang nga ruh nga ai ka jingkyrshan ïa ka kompeni. “
U Chairman jong ka Elaka Rymbai u Bah Merimon Rymbai, u la ong, hadien ba ka elaka ka la sngap ïa ka jingpynsngew jong ki nongshong shnong naduh ki por ba mynshwa hashwa ba ka Elaka kan ai ïa ka NoC ngi la bishar ïa ki jingdonkam jong ki shnong bad dei ruh lyngba ka jingïoh bor na ki shnong ba ka Eelaka ka la ai ïa ka NoC. “Ngi la bishar shwa hashwa ban ai ïa ka NoC bad ka Elaka ka ai ïa ka jingkyrshan kumba ki nongshong shnong ki la ai ka jingkyrshan,” u la bynrap.
Kiba la ai jingkren ban ai jingkyrshan pura ïa ka Goldstone Cements Ltd ki kynthup ruh u Bah Bishar Muksor na ka shnong Umrasiang, u Bah Moonlang Tlang na Musiang Lamare (Old), u Bah Charlie Pohtam na ka shnong Umlong bad kiwei kiwei.
ïa ka jingbatai bniah ne ka presentation la pynsngew da u S. Kamaswara Rao (Managing Partner) ha kaba ïadei bad kine ki projek tih mawshun jong ka kompani Goldstone Cements Ltd.

Leave A Reply

Your email address will not be published.