5000 hectar ka jaka bad kumba 2 klur tam ki tynrai dieng ladep ban thung

Mawkyrwat, Jylliew 11: Ka Regeneration Meghalaya Project (RMP), lyngba ka Hill Farmer Shi-i-take Mushroom Co-operative Society, World View Impact, bad ka EarthTree, ki la ïasnohktilang ban rakhe ïa ka sngi pynneh-pynsah ïa ka mariang ne ka World Environment Day 2026 ha Mawkyrwat bad kumjuh ruh da kaba thung ki tynrai dieng ha Rilang College, Mawsaw, South West Khasi Hills District.
Lah ban kdew ba kane ka project kam dei kaba bei pisa da ka Sorkar, hynrei ka dei kaba bei pisa tyngka da ka Company AstraZeneca. Ka daw kaba pynlong ïa kane ka company ban bei pisa ka long ban pynjyrngam biang ïa ka mariang kaba long shibynta ka kam jong ka company ban trei ha ka dur jong ka Carbon Credit lyngba ki dieng ba la dep thung.
U kongsan ha kane ka prokram, u dei u Bah C.S. Kassar, MCS, Additional Deputy Commissioner ka South West Khasi Hills District ha ryngkat ka jingdonlang u Bah Commander Shangpliang uba dei kum u Chairman jong ka Hill Farmers Shi-i-take Mushroom Co-operative Society Limited, ka Kong Ibadaphunshisha Blah, Managing Director Worview Impact, ki Rangbah Shnong bad ki Myntri shnong kiba hap hapoh ka South West Khasi Hills District.
U Bah C.S. Kassar, MCS, Additional Deputy Commissioner ka South West Khasi Hills District haba ai jingkren ha kane ka sngi, ula pynshai halor ki lai tylli ki mat ba kongsan eh ban pynneh pynsah ïa ka mariang sawdong sawkun. “Kawei na ki mat ka dei ban pynphriang ïa ka ‘Green Cover’ hapoh ka South West Khasi Hills District da kaba thung ïa ki dieng ki siej”, u la ong. Nangta, shuh shuh u la bynrap ba kaba ar, ka long ba ula ban jur halor ka ban pynduna ïa ka jingpyndonkam ïa ki plastik bad kaba khatduh, ula kyntu ïa u paidbah ban ïashimbynta bad don ka jingïatreilang ban pynbha bad pynkhuid ïa ka dong ka thaiñ baroh kawei.
Katba ha ka jingkren jong u u Bah Commander Shangpliang, Chairman jong ka Hill Farmers Shi-i-take Mushroom Co-operative Society Limited ula batai shai shaphang ka Project Regeneration Meghalaya, kaba long ka jingïatreilang hapdeng ka Hill Farmer’s Shi-i-take Mushroom Co-operative Society, World View Impact, bad ka EarthTree. Ym tangkata u la batai shuh shuh ba kane ka dei ka projek ban pynjyrngam biang ïa ki jaka kiba la syllen ne ki bym dieng shuh da kaba thung ki tynrai dieng, bad lyngba kane Carbon Credit.
Haba batai biang ha kaba ïa dei bad kane ka projek thung dieng, u bah Commander u la ong ba, ïa ki symbai dieng bad ka bai bylla lah pynlut hi da kane ka projek bad ki trai jaka kim donkam ban pynlut ei ei. Haba pynshai halor Ka jingteh kular (Agreement), u bah Commander u la ong ba ka jingïatehkular ka dei beit thik tang na ka bynta ka Carbon, kam dei halor ka jaka ka puta, “lait noh ba kin nym ot ïa u dieng metbah ha ki 40 tylli ki snem naduh ba la sdang ban thung, hynrei ki lah ban pyndonkam ïa ki jaka jong ki kum ki jaka jngohkai pyrthei (Tourist Spots) ne ban tam ïa ki dieng kiba la ïap bad kumjuh ruh rep ban riang”, u la ai jingpynsai.
“Ka Regeneration Meghalaya Project ka la dep ban thung haduh 2 klur tam tylli ki dieng ha kylleng ka jylla lyngba ka jingïatreilang bad kumba 3,500 ngut ki trai jaka, kynthup ïa ki riew shimet, ki kur, bad ki shnong bad haduh 5,000 hectar ka jaka ki lah dep ban pynthung dieng”, la bynrap u Commander ïa ka jingkren jong u.
Namarkata, u bah Commander u la kyntu bad buh jingkyrpad ïa ki trai jaka, ki kur, ne ki shnong kiba don jaka syllen bad kiba kwah ban thung dieng, ban ïakynduh bad ki District Co-ordinator bapher bapher kiba don ha ki district bapher bapher ha ka jylla.
Ïa ka jingïalang ha kane ka sngi la pynïaid da u bah Allfondbirth Kharsyntiew uba dei u Secretary jong ka Hill Farmers Shi-i-take Mushroom Co-operative Society Limited.