Mawkyrwat Nailur 28: Ka South West Khasi hills District Congress Committee mynta ka sngi ki la pynlong ïa ka jingïaid paidbah ne rally ban pyrshah bad dawa ban weng mardor ïa u Gyanesh Kumar uba dei u Chief Election Commissioner (CEC) ka Election Commission jong ka ri India.
Hadien ka jingïaid paidbah, u bah Kynpham V Kharlyngdoh uba dei u President ka South West Khasi Hills District Congress Committee haba kren bad ki nongthoh khubor u la ïathuh ba kane ka jingïaid paidbah ka dei kum ka dak ban pynrem ïa ka jingtuh pylleiñ pylleiñ ïa ki vote da ka Election Commission ban pynjop ïa ka BJP.
“Ka jingthuh ïa ki vote ka dei ha kiba bun ki jaka ha Maharashtra, Haryana, West Bengal, Assam kaba la ïohi ba lyngba ka ECI ba ka la ïarap ïa ka BJP ban jop”, ong u bah Kharlyngdoh. Shuh shuh ula ong ruh ba kane ka SIR kaba la pynlong da ka BJP ka long pyrshah ïa ka riti trei kam ka ri bad ka long ruh kaei kaei kaba long pyrshah ïa ka mon jong u Paidbah.
U bah Kharlyngdoh u la ong ba kane ka jingleh ka BJP ka long ban noh tang sha ka BJP bad ïa ka liangpyrshah ka la weng lut ïa ka Vote khamtam kito kiba kyrshan ïa ka liang pyrshah kaba ïa khun pyrshah ïa ka BJP.
Ym tangkata, ula bynrap ba ka Congress ha baroh ka India ka la pynlong ïa kane ka jingïa-ïaid paidbah ban ïa snoh kti lang bad ka All India Congress Committee ne AICC hapoh ka ri India baroh kawei namar kane jingleh jong ka BJP ka la long palat. “Ka congress ka dawa ba ka sorkar ka dei ban kem mardor ïa u Gyanesh Kumar bad ba u dei ruh ban iehnoh kam noh kum u Chief Election Commissioner ka ECI”, u la bynrap.
U la ïathuh ruh ba ïa kane ka SIR kaba la leh mynta la pyrshah da ki arngut ki Commissioner kata u Sukhbir Singh Sandhu bad u Vivek Joshi hynrei u Gyanesh Kumar u khlem sngap ïa kata ka jingpynsngew bad u la ïaid shakhmat ïa kane ka SIR bad khamtam ban weng noh ïa ka vote jong ki nongkyrshan ka liang pyrshah, bad shibynta ba kane ka jingleh jong u ka long ban noh sha ka BJP bad ha kiba bun ki jylla ba ka BJP ka jop ka dei na kane ka daw.
U bah Kharlyngdoh u la ong ruh ba lada ka Sorkar India kam weng ïa u Gyanesh Kumar ka Congress kan pynjur ïa ka jingïakhih nangne shakhmat haduh ba un da iehnoh kam. Ka Congress ka don lang bad ki paidbah kiba la shah weng ïa ka Vote ka jong ki khlem kano kano ka daw bad ka nongrim kaba ki weng noh.
Ha kane ka jingïaid paidbah ki nongkyrshan ka Congress ki la thang ruh ia ka tynshop jong u Chief Election Commissioner (CEC) ka Election Commission jong ka ri India u Gyanesh Kumar.
