Ïaid rally ka WJH District Congress Committee ha Jowai ban dawa kem ïa u CEC ka Ri
Jowai, Nailur 28: Ka West Jaiñtia Hills District Congress Committee (WJHDCC) mynta ka sngi 28 tarik u Nailur, 2026 kala pynlong ïa ka jingïaid rally kaba la sdang naduh na ophis jong ka Party kaba don ha New Hill bad ïaid lyngba ka Iawmusiang haduh Stand War bad pynlong ka jingïalang ba lyngkot ban dawa kem noh ïa u Chief Election Commissioner ka ri India u Gyanesh Kumar.
Kane ka jingdawa kem ïa u Chief Election Commissioner ka Ri bala bthah sha baroh ki shnat treikam ka Party da ka All India Congress Committee halor ka jingkynnoh jong ka jingleh thok bad leh buit tuh jong u haka jingpynrung kyrteng nongthep vote lyngba ka Special Intensive Revision (SIR) – 2026.
Ha kane ka sngi la wan ïashim bynta da ki dkhot ka Party naduh u MDC ma Rikut Parien uba dei u President West Jaiñtia Hills District Congress Committee, MDC ma Madonbai Rymbai u President 2-Jowai BCC, ma E. War u General Secretary West Jaiñtia Hills, u ma Rishot Thubru uba dei u President Youth Wings lem bad kiwei de.
U ma Rikut Parien haba kren ula ai khublei ïa baroh ki dkhot jong ka party kiba la wan sha kane ka jingïaid rally ban pyrshah jur ïa ka jingleh thurmur u CEC ka Ri uba la pyrshang ban pynduh ïa ki vote kiba dei hok ban ïoh bad da kaba pynrung da kiwei pat kiba ym dei hok. Kumta ka Party kala pyrshah jur ïa kane ka jinglehbor jong ka party BJP kaba don haka bor synshar.
U ma Madonbai Rymbai ula pynsngew ïa ka jingpyrshah jur ïa kane ka jingleh u CEC ka Ri ha kaba ïadei bad SIR ha kylleng ki Jylla kum ha Maharashtra, Karnataka, West Bengal bad Assam bad kaba ym lah ban pdiang da ki nongshong shnong, ula khot ïa kiwei de ki seng saiñ hima sima ban kin mih shakhmat ban pyrshah ïa kane ka jingleh thurmur ha kaba la don ruh ka juh ka kyrteng kaba paw ha ki ar jaka kaba dei ruh nabar Ri.
Katba u ma E. War ula ong naduh u nongïalam ha hakhlieh ka Congress ula dep kren shai ïa kane ka jingleh buit tuh halor ka jingpynrung kyrteng thep vote bad ka jingdawa hi mynta dei ban kem mardor ïa u Chief Election Commissioner ka ri India, u Gyanesh Kumar bad weng syndon ïa u na kane ka kam.