Ka dheng kali, ka um, jaboh jabaiñ ki dei ki mat ba kongsan ba pynktha khlieh ïa ki nong Shillong

Shillong, Nailur 28 : Ha ka jingïalang kaba nyngkong eh jongka Neighbourhoods of the Future (NOTF) ki nong shong shnong ka nongbah Shillong ki la ñiewtang ba ka dheng kali, ka um, ka jingbym don lynti ïaid kjat, ka jingsahkut ki nala, ka jingbym pynïakhlad ïa ki jaboh jabaiñ, ka jingdum ki lynti ïaid ki dei ki mat ba kongsan ba pynkthah khlieh ïa ki man la ka sngi.
Ha ka jingïalang ba arsngi ba la pynlong ha ka 25 bad 26 tarik ha Bosco Integrated Development Society, Nongthymmai, la wan ban ïashim bynta da ki Rangbah Shnong, ki Seng longkmie, ki samla pule bad ki seng bapher bapher. Ha ka sngi ba ar la pynlong ka jingïaid kjat naduh Motinagar, Malki, Wahingdoh bad ïewduh.
Haba ai nuksa kawei ka longkmie kaba pule hangne ha nongbah Shillong ha ki snem 1960 ka la ong, “Ka nongbah ba nga tip ha kato ka por nga ïohi ïa ki khynnah skul ba ki ïaid kjat ban leit sha skul, ki madan Polo ki dang da ki paidbah ban peitkai ïa ka jingïamareh thong ki kulai, ka wahduid ba khuid ba tuid najan CRP Camp. “ Mynta la ïohi ba ïa ki kali la pynieng ha ki rud surok, ki nala ki shlei, ïa ki jakhlia ne synrum synreh ym ju pynïakhlad bad ka umdih ruh ym ju thikna. Ka Jal Jeevan Mission ka don tang bna ka treikam tang ha kito ki jaka ba ki tyllong umdih ki la don lypa” .
ka NOTF ka treikam ha Bengaluru, Bhubaneswar, Maharashtra bad Meghalaya, Ha Shillong la peit bad pynïaid da ka Sauramandala Foundation bad ka Socratus bad Rainmatter Foundation.
Ki nongmihkhmat na ka Sauramandala Foundation ki la ong ba ka NOTF kam dei ka rynsan ka ban weng ïa ki jingeh, hynrei ka kwah ban tip kaei kaba phi sngew ba kam biang, kaei kaba phi kwah ban pynneh pynsah bad katno ka por bad bor kaba phin synñiang.
Ka Raimatter Foundation ka pynpaw ba kane ka model ka wan na Bengaluru ha kaba ki paidbah ki ujor sha ka sorkar ha kaba ka sorkar ka hap ban pynbiang ïa ki surok, ki bording ha ki lynti ïaid, ka leit ka wan, ka kit ka bah. Hynrei donkam pat ba kan tip kaei kaba ki nongshong shnong ki mad na kito ki kam shakri jongka.
Na ka bynta ki nongwan ïashim bynta ka dheng kali ka dei kawei na ki mat ba hakhmat eh. Kawei ka longkmie ka ong ba ka jingbym don shuh ki lynti ïaid kjat, ka jingkhapngiah ka la pynlong ïa ki riew tymmen ban thait ban mih na la ïing. Uwei u samla pule u la ai nuksa ïa ka jingshah tuh ka thuk thuk tang hapoh shi kynta hajan ïing Mane na ka daw bym don ki CCTV bad ki jaka pynïeng kiba biang.
La wanrah ruh ïa ki jingkylli ïa ka bynta ki Dorbar Shnong khamtam ha kito ki Dong bad shnong ba ïakhleh jaidbynriew.
“ Ka Dorbar jong ngi ka ju ïa kynduh shisien shisnem ne hateng hateng haduh ar ne lai sien ruh bad baroh ki lah ban wan sha ka dorbar, Ki Seng Samla, Seng Kynthei ki ai kaiphod ïa ki jingtreikam jongki. Ka jingshakri ka long lai snem. Ki paidbah ki ju ud halor ki nala, ki bording ha ki lynti ïaid bad don kiba ka dorbar ka leh hi” ong uwei u dkhot ka Dorbar Shnong.
Don pat kiba ujor kiba ong ba kim ju tip mynno long dorbar ne mynno ïajied nongkitkam. “ Ngam pat ju shah khot sha ka Dorbar” ong kawei ka longkmie.
U bah Nicky J u ong ki Dorbar ki don ki kyndon treikam tangba kham tlot ka jingpyntreikam ïa ki. Kumta u la ong ba ki briew ki wan ujor sha u ban ïa kaba ki leit sha ki Dorbar ne sha ki tnad sorkar.