Nongpoh, Nailur 28 : U wei u rangbah uba don kumba 55 haduh 60 snem ka rta, uba ym shym la lah ban ithuh ïa ka kyrteng bad ka jaka sah, la lap ba u thiah khlem jingtip briew hapoh ka phyllaw jong ka NES Bharat Petrol Pump, 12th Mile, Mawsmai, Ri Bhoi District.
Katkum ka jingtip kaba la ioh, ha ka por kumba 8:30 mynstep jong ka 25 tarik Nailur, ki pulit ki la ioh ka jingpyntip lyngba ka phone na u Jaswan Singh, Manager jong ka petrol pump, halor ka jinglap ïa uwei u briew uba thiah khlem tip briew ha katei ka petrol pump.
Haba ki pulit ki la pynlong ïa ka jingtohkit, u Ranjan Kumar, uba trei ha katei ka petrol pump, u la pyntip ba ha ka por kumba 2:00 mynstep u la iohi ïa uwei u rangbah uba thiah marjan bad ka jaka leit bar jong ka petrol pump.
Hynrei, ha ka por kumba 5:30 mynstep, haba u la leit ban kyrsiew ïa utei u briew, u la lap ba u khlem tip briew bad um shym la jubab. Hadien kane, u la pyntip ïa u Manager jong ka petrol pump, uba la pyntip pat sha ka tnad pulit.
Ha ka jingtohkit, la lap ba utei u briew la ju iohi ïa u ba u lum ïa ki mar jot ha kylleng katei ka thaiñ, watla katta, haduh mynta ym shym la lah ban ithuh ïa ka kyrteng, ka shnong bad ka jaka sah jong utei u briew. Ki Pulit ki la wad jingtip ruh na ki nongshong shnong kiba marjan bad na u Rangbah Shnong jong ka thaiñ, hynrei ym shym la don mano mano uba lah ban ithuh ïa utei u rangbah bad ym shym la lap ne ioh jingtip ïaki bahaiing hasem jong u, bad ïa ka met la rah noh sha Civil Hospital, Nongpoh, na ka bynta ban leh ïa ka post-mortem examination.
U tei u rangbah u phong ka T-shirt kaba rong suiñbneng, ka jain pien kaba thoh laiñ, ka sniehdoh kaba rong ktieh, u shñiuh bad u tmaiñ ba rong dpei, kino kino kiba don jingtip shaphang utei u rangbah kin pyntip sha Police Control Room ha u no. 6909300160.
