Leit jurip u MLA ïa ka jaka ban tei ïa ki ophis treikam ka Mawshynrut Civil Sub-Division

Nongstoiñ, Nailur 28 :  Wat la ka Mawshynrut ka la  ïoh ïa ka Civil Sub Divission  hynrei haduh kine ki sngi kam pat don namar  ïa ki ophis trei kam ba pura  hynrei ïa ki ophis trei kam dang shu shong wai ha ka PHC ba rim kaba don ha Riangdo. Ka long pat kaba sngewtynnad bad kaba pynkmen ïa ki paitbah jong baroh ki shnong kiba hap ha katei ka Civil Sub Divission  namar ba ka sorkar ka la dep mang pisa kumba phra klur bad lai lakh tam  na ka bynta ban tei noh ïa ki ophis trei kam ba pura jong katei ka Civil Sub Divission.
Ïa ka jingmang pisa jong ka sorkar na ka bynta ban tei ïa ki ophis trei kam ba pura la pynthikna  da u bah Methodius Dkhar MLA ka Mawshynrut constituency ha ka jingleit jurp jong u ïa katei ka jaka kaba don ha ka shnong Tynrongriangkhon kyntoit Lumdierngsong ha kane ka lah sngi u blei ka 28 tarik Nailur.
Ha katei ka jingleit jurip jong u MLA ïa katei ka jaka la synran lang da u babu Witting Mawsor MLA barim ka Mawshynrut, u bah Sraly Rashir MDC, ki ophisar jong ka tnad PWD R&B u kontraktor u ban pyntrei ïa kitei ki ophis, ki trai jong katei ka jaka bad ki riew rangbah na ki shnong ba marjan .
U bah Methodius haba aijingkren ha ki lad-pathaikhubor ha katei ka jaka u la pynkynmaw ba  ïa ka jingdawa  Civil Sub Divission ha Mawshynrut la sdang ban ïakren paitbah naduh u snem 1990 ha ka por ba u dang leit skul ha Christ King secondary school bad ka la bteng ter ter katba nang ïaid ki snem. U la ong ruh ba dei tad haduh u snem 2017 ha ka por ba u bah Witting Mawsor  u long kum u MLA ka Mawshynrut ba ka sorkar ka la ai ïa katei ka Civil Sub Division. Ha kajuh ka por u la ong ba ka jingpyntrei ïa ki ophis trei kam ba pura  ha katei ka jaka kan sa sdang noh ha kine ki sngi bad kan long ka jingkyrkhu kaba khraw ïa ki paitbah.
Ha katei ka sngi  na ka liang u sordar jongka shnong Tynrongriangkhon uba dei ruh u Chairman jong ki sawphewar tylli ki long ïng kiba dei ki trai jong katei ka jaka u la pynpaw ïa ka jingsngew kmen kaba khraw namar naduh ba ka sorkar ka la phah ïa ki briew ban wan sorjamin ïa katei ka jaka baroh sawphewar tylli ki long ïng kiba dei trai ïa ka khyndew Tynrongriangkhon ki la ïamynjur lang khlem kano kano ka jingkhñium.
Ha kajuh ka por u la ong ba ka jingdon jong ki ophis trei kam jong ka Mawshynrut Civil Sub Divission ha katei ka jaka kan wanrah shibun ki jingkylla ha ka shnog ka thaw, ka ïoh ka kot bad kiwei kiwei.
Nalor kata na ka liang ki rangbah shnong katei ka thaiñ ki la pynpaw ïa ka jingsngew nguh  bad ki la aikhublei kyrpang ïa u babu Witting Mawsor MLA barim u ba la wan rah ïa ka Civil Sub Division bad khamtam eh ki la ai khublei kyrpang ïa u bah Methodius Dkhar MLA ba mynta uba la trei shitom ban pynsngew sha ka sorkar ba kan manmg pisa na ka bynta ban pyntrei noh ïa kitei ki ophjis trei kam ba ki loa khmih lynti la bun bun snem.