Da ka jingthung dieng rakhe ïa ka World Environment Day ka ophis DS&WC ha shnong Rangthong
Mawkyrwat, Jylliew 11 : Ka Ophis jong u Divisional Soil & Water Conservation Officer, Mawkyrwat Division, South West Khasi Hills District, ka la rakhe ïa ka World Environment Day 2026 da kaba pynlong ïa ka jingthung dieng bad ka Awareness Program ha Rangthong Community Hall halor ka phang “Inspired by Nature. For Climate. For Our Future.” kaba ban jur ïa ka jingdonkam ban sumar ïa ka mariang bad ban leh ïa kiei kiei ki kam na ka bynta ka jingbha na ka bynta ka mei mariang.
Ka jingthmu jong kane ka sienjam ka long ban kyntiew ïa ka jingpynneh pynsah ïa ka mariang, ban pynbun ïa ki jaka ba long jyrngam lyngba ka jingthung dieng, bad ban pynsngewthuh paidbah halor ka jingdonkam ban ïada ïa ki marpoh khyndew bad ban ïakhun pyrshah ïa ki jingeh ba mih na ka jingkylla ka suiñbneng.
Ha kane ka prokram la sakhi ïa ka jingïashimbynta shit rhem da ki nongshong shnong, ki khynnah skul, ki nonghikai bad ki ophisar na ki tnad Forest bad Agriculture jong ka South West Khasi Hills District ha kaba u kongsan ha kane ka sngi u dei u Bah I. Lawrynñiang, MCS, Block Development Officer ka Mawkyrwat C&RD Block.
U Bah J.J. Lakiang, Divisional Soil & Water Conservation Officer, South West Khasi Hills District, ula ai ka jingbatai paidbah lyngba ka PowerPoint halor ka phang “Spring Conservation and Rejuvenation Works”, da kaba ban jur ïa ka jingdonkam ban ïada bad pynbha biang ïa ki tyllong um khnang ban pynskhem ïa ka jingpynïaid ïa ka mariang kaba neh slem. Katba u Bah Polin Lyngdoh na ka Tnad Forest ruh ula kren ha kane ka jingïalang bad batai halor ka jingdonkam jong ka jingpynneh pynsah ïa ka mariang.
Ha kane ka prokram la pynbyrngia ruh da ka jingrwai bad jingshad tynrai ba la pyni da ka Ri Maram Folk Academy, Mawlangwir.
Kum shi bynta jong ka jingrakhe la pynlong ruh ïa ka jingïakob dro dur, ha kaba ka Kong Emily Iawphniaw na Rangthong Christian Higher Secondary School ka la ïoh ïa ka nam jingïalehkai kaba nyngkong. Ka Kong Baiakmenlang Thongni, na kajuh ka skul, ka la ïoh ïa ka nam kaba ar, katba ka Kong Balawanshwa Syiemlieh na Umpohliew Jingtip Lower Primary & Upper Primary School ka la ïoh ïa ka nam kaba lai.
Ka prokram ka la kut da ka jingthung dieng paidbah kum ka dak jong ka jingangnud ban pynneh pynsah ïa ka mariang bad ban tei ïa ka lawei kaba khuid bad kaba jyrngam na ka bynta ki pateng ban wan.