Kwah u MLA ka BJP ban pynrung noh ka sorkar pdeng ïa ka ktien Khasi bad Garo ha ka Khyrnit ba Phra

By Mawphor Editor On Jun 12, 2026

Shillong, Jylliew 11 : U Myntri barim ka Sorkar bad nongïalam ka BJP uba dei ruh u MLA ka Pynthor u Bah AL Hek u la dawa na ka Sorkar Pdeng ban ai noh ka jingithuh kat kum ka riti synshar jong ka ri India ïa ka ktien Khasi bad Garo da kaba pynrung ïa ki ha ka Khyrnit kaba Phra (Eighth Schedule), hadien ba ka sorkar Meghalaya ka la pynmih dang shen ïa ka aiñ rew ban iathuh ïa kine ki ar tylli ki ktien kum ki ktien sorkar.
U Bah Hek u la ong ba ka Jylla ka la dep ban shim ïa ka sienjam ba donkam bad kaba kongsan bad kaba sah mynta ka shong ha New Delhi.
“Ka jingpynrung ïa ka ktien Khasi bad Garo, dang shen ngi la ïohi ba ka sorkar MDA-II ka la dep mynjur ïa ka ordinance kaba la mynjur da u Lat ka Jylla ba kine ki artylli ki ktien kin long kum ki ktien sorkar. Ngi la leh ïa kane ha ki por ba la dep ruh lyngba ka Ordinance” ong u Bah Hek.
U Bah Hek ula kdew ba watla baroh ar tylli ki ktien ki treikam kum ki Official Languages jong ka Jylla hynrei ka jingithuh ka dang dei tang hapoh ka Jylla Meghalaya.
“Mynshuwa ka jylla Meghalaya ka ithuh ia ka ktien Khasi bad ka Garo kum ki dei ki Associate Official Languages. Mynta ruh ka dei tang lyngba ka Ordinance tangba la ithuh ia ki kum ki Official Languages” u la bynrap.
Une u nongïalam ka BJP u la ong ba ka Party kan pynbor ïa ka Sorkar Pdeng ban pyndep ïa kane ka kam. “Mynta kaba kongsan hangne ka long ba ngi hap ban kyrpad bad dawa ïa ka Sorkar India ban pynrung ïa ka ktien Khasi bad Garo ha ka Khyrnit kaba phra jong ka riti synshar ka ri India ban ïoh ïa ka jingithuh ba pura” ula ong.
Haba kylli shaphang ka bynta jong ka BJP, u Bah Hek u la ong ba ka jingdon nongmihkhmat jong ka Party ha ka Sorkar MDA ka ai ïa ka lynti ba beit beit ban tynruh ïa kane ka jingdawa.
“Ka BJP ka don 2 ngut ki MLA, ha kaba uwei u dei u Myntri Sorkar bad ngi buddien ïa kane ban pynthikna ba ka Sorkar India kan ithuh ïa ka ktien Khasi bad Garo da kaba pynrung ha ka Khyrnit kaba phra jong ka riti synshar ka ri India” ula ong.